اسلام آباد۔ 01 اگست (اے پی پی) وزیرخارجہ بلاول بھٹو زرداری قرآن پاک نا بے شرفی نا اسلاموفوبک و خارتس کارروائی تا سخت انگا لوز آتیٹی مذمت ءِ کرسا بین المذاہب ہم آہنگی و پرامن بقائے باہمی ءِ مون آ دننگ نا گرج آ زور شاغا، او دوشنبے نادے آ اسلامی کمکار تنظیم (او آئی سی) نا وزراء خارجہ نا کونسل نا 18 می بھلا دیوان آن تران کریکہ ، اودیوان اٹی ورچوئل بشخ ہلک، دا دیوان قرآن پاک نا بے شرفی نا وار وار پیش بروک آ واقعہ غاتیا شرہ کن بٹنگا سس ہراڑان مچ آ دنیا نا مسلمان تا جوزہ غاک مجروح مسنو۔ اوآئی سی وزراخارجہ کونسل دیوان آن تران کرسا بلاول بھٹو زرداری دا ہیت آ زور شاغا کہ داوڑنا کارروائیک و اوفتے برجاتخنگ نا موکل تننگ آجوئی درشانی سلاہ اف، داوڑنا واقعہ غاتیان مذہبی خار و بے سگی نا درشانی مریک، وزیرخارجہ قرآن پاک ءِ ہُشنگ و بے شرفی نا رزاک اٹ کارروائی تا بارواٹی گڑتی تے تالان کننگ کن او آئی سی نا باسک ملک خاص وڑاٹ جدہ، جنیوا، و نیویارک اتون اواری اٹ کاریم کننگ نا پاکستان نا عزم انا درشانی ءِ کرے۔ اواقوام متحدہ نا انسانی حق کونسل و اقوام متحدہ نا جنرل اسمبلی ٹی بین المذاہب مکالمہ و مذہبی خار آن مرمننگ نا وکالت کروک آ قرارداد آتا منظوری نا ستاءِ کرے۔ بلاول بھٹو برجاسال انا اول اٹی اسلاموفوبیا تون مون تننگ نا جہانی دے انا وخت آ ایکشن پلان کن پیش کروک تینا سلاہ نا درشانیءِ کرے ہراٹی اسلاموفوبیا تون مون تننگ کن اقوام متحدہ نا خصوصی ایلچی نا تقرری و عدالتی میکانزم نا قیام اوار ءِ تانکہ ڈوہدار تے جوابدہ کننگ مرے۔ او آئی سی وزراخارجہ نا کونسل بے سگی، امتیازی سلوک واسلاموفوبیا نا ودوک آ واقعہ غاتیا گڑتی نا درشانی ءِ کرسا جوان ءُ قرارداد اس منظور کرے ہراٹی اقوام متحدہ نا انسانی حق کونسل امنائی وڑاٹ مذہب و عقیدہ نا بنداو آ خار، امتیازی سلوک، بدنامی و بیدادی ءِ ہُشکا تننگ نا واقعہ غاتون مون تننگ کن 8 ٹکی ایکشن پلان نا اہمیت نا درشانی ءِ کننگا، قرارداد اٹی غٹ حکومت آتیان ساڑی کانودی و انتظامی فریم ورک ءِ پورو وڑاٹ نافذ کننگ یا مذہب و عقیدہ نا بنداو آ غٹ بندغ آتے خار و بیدادی آن بچفنگ کن پوسکن آ کانود سازی کننگ نا خواست ہم کننگا۔
