اسلام آباد۔ 01 اگست (اے پی پی) صدر مملکت ڈاکٹر عارف علوی پارینے کہ پاکستان ملائیشیا تنو واپار، زرگزران، تعلیم و دودوربیدگ نا بشخ آتیٹی ہڑتوم آ کنڈآتا کمکاری ءِ پین گچین کننگ خواہک، ملائیشیا نا پوریاگرآک پاکستان نا زرکاری دوست پالیسی تیان فائدہ ہرفر۔ صدر مملکت داخیال آتا درشانی ءِ ملائیشیا ٹی پاکستان نا پندارہائی کمشنر سید احسن رضاشاہ تون گپ وتران کرسا کرے ہرا سے شنبے نادے آ داڑے ایوان صدر اٹی اوڑتون اوڑدہی کرے۔ اوپارے کہ پاکستان ملائیشیا تون تینا تاریخی و ایلمی تعلقداری تے بھاز اہمیت ایتک، ملائیشیا تون واپاری و اقتصادی کمکاری نا پوسکن ءُ وارخواہی پٹنگے۔ صدر مملکت پندار سفیر آ زور شاغا کہ او ملائیشیا نا پوریاگر برادری، چیمبرز آف کامرس تون رابطہ غاتے مون آدے، تدوک آ سال تیٹی ہڑتوم آ ملک آتا نیام اٹ واپار اٹی خاطرخواہ ودکی مون آ بسنے، ویلیو ایڈڈ مصنوعات آتا کمک اٹ ملائیشیا ءِ پاکستان نا برآمد آتے پین ودفنگ کن کوشست کننگے۔ اوپارے کہ پندار ہائی کمشنر ملائیشیا ٹی پاکستانی افرادی قوت نا آسراتی و آسودہی کن کاریم کے و ہڑتوم آ ملک آتا نیام اٹ ہڑتوم آ کنڈآتا تعلقداری تے پین سوگو و گیشتر کننگ کن کوشست کے۔ صدر مملکت فنانشل ایکشن ٹاسک فورس انا سلاہ و سوج آتیا عملدرآمد اٹی پاکستان نا کمک آ ملائیشیا نا حکومت نا منت واری ءِ ہرفے۔ صدر مملکت پندار ہائی کمشنر ءِتقرری آ مبارکبادی تس و نیک است خواہی نا درشانی ءِ کرے۔
