اسلام آباد۔ 25مئی (اے پی پی) پاکستان چین تعلقداریک دنیا نا سفارتی تاریخ اٹی منفرد حیثیت اس تخرہ ہرا مابت ، خلوص ، پرامن تین پہ تینی و غٹ آن زیات پت انا رشتہ ٹی تفوک ئُ۔ چین پاکستان اقتصادی راہداری نا کیہی وخت آتیا محیط اسٹریٹجک تعلقداری تے جیواکنامک پارٹنر شپ اٹی بدلیفینو، بدقسمتی آن مسکوہی نا حکومت آک او تعلقداری تے ملک انا معاشی مفادآتے کن کاریم اٹ اتوس بلکن دنیا نا ایلو بھلا قوت آتون اسٹریٹجک لائنس اٹی اوار مرسا ملک ئِ خاخر اٹی خسار۔ اولیکو مرحلہ ٹی مروک آ زرکاری اسہ چنکو زرکاری اسے و 2030 ءاسکان دا ڈٹ انا رداٹ سد آ ارب ڈالر پاکستان اٹی کیہی ڈٹ آتیٹی بریرہ۔ چارشنبے آ پلاننگ کمیشن نا ذرائع اے پی پی ئِ پارے کہ اقتصادی راہداری نا کیہی ڈٹ آتیا ترندی اٹ کاریم جاری ئِ ، گوادر کوئٹہ سیکشن دسمبر 2016ءاسکان فعال مریک و ڈی آئی خان۔برہان جون 2018ءاسکان پورو مریک۔ اوپارے کہ بیست ئُ یک می صدی ایشیاءنا صدی ئِ ، مسابقتی برتری انگا معیشت تون دا صدی اٹی مون آ ہنوئی ئِ۔ ہراڑکن معیشت اٹی جدت و کوالٹی آ توجوہ تروئی مریک۔ اوپارے کہ پاکستان نا جغرافیائی حیثیت و پاک چین ہڑتوم آکنڈآتا کمکاری ٹی ودکی و سویلی ایشیاءئِ دے ٹکی نیامی تون منسلک کننگ نا بابت چین اقتصادی راہداری ڈٹ انا رداٹ پاکستان اٹی 46ارب ڈالر آن زیات نا زرکاری کننگ ئِ۔ چین پاکستان اقتصادی راہداری ڈٹ (سی پیک) نا رداٹ چین پاکستان اٹی بندرگاہ ، جہازرانی، بنداوی ڈھانچہ، مواصلات و توانائی تون اوار ایلو کیہی بشخ آتیٹی زرکاری کننگ ئِ۔ ہراڑآن پاک چین ہڑتوم آ کنڈآتا کمک و پاکستان نا معاشی شون انا مون آ دننگ اٹی کمک دوئی مریک۔ پاک چین اقتصادی راہداری ڈٹ (سی پیک) ہڑتوم آکنڈآتا تعلقداری نا روشن مثال ئِ ہرامچ آ دنیا نا چائندار اقتصادیات آتا نظر اٹی گیم چینجر ثابت مریک۔
