کوئٹہ۔ 25مئی (اے پی پی) بنجائی وزیر واپار انجینئر خرم دستگیر پارینے کہ جہانی واپار نا مون آ دننگ کن پاک اوغان سیمی علاقہ چمن اٹی جہانی معیار نا جدید لینڈ پورٹ بروک آ سال جولائی آن کاریم نا بنائِ کیک ، بارڈر علاقہ غاتیٹی پاکستانی کنڈآتیا امیگریشن نا جدید آسراتی درستی راستی کرفنگ انگ ئِ و کسٹم ، ایف آئی اے و وزارت واپار اسیجائی گام گیج آتا رداٹ واپاری آسراتی تتون اوار اوار جملہ معاملہ غاتے ریگولیٹ کرسا واپاری گڑا و بندغ آتا ہن و بر نا رجسٹریشن نا ڈیٹا مرتب کیک۔ دا ہیت ئِ او چارشنبے آ کسٹم ہاﺅس کوئٹہ ٹی کلکٹر کسٹم بلوچستان ڈاکٹر سعید جدون نا کنڈآن تروک آ بریفنگ اٹی درشانِ خیال کرسا کرے۔ داوخت آ اودے بارڈر علاقہ غاتیٹی کسٹم نا کنڈآن چست کروک آ گام گیج و بروک آ ڈٹ آتیان بابت سرجم حوال تننگا۔ بنجائی وزیر کسٹم بلوچستان نا کنڈآن اسمگلنگ نا تدارک و مسافر، زائر و واپاری حلقہ غاتے کن آسراتی تا فراوانی نا ڈٹ آتیا است جمی نا درشانی ئِ کرسا وزارت واپار نا کنڈآن تینا ہر ممکن کمک نا یخین ترفے ، بریفنگ اٹی ایڈیشنل سیکرٹری واپار روبینہ عطاءہم ساڑی ئس۔ بنجائی وزیر واپار خرم دستگیر تینا مسہ دے ئی دورہ بلوچستان نا ایسری آ ”اے پی پی“ تون خصوصی ہیت و گپ کرسا پارے کہ اونا دورہ نا اصل مسخت واپاری سرجزو پاک اوغان و پاک ایران بارڈر آ خلقت و واپاری ٹریفک نا جاچ ئِ ہلوئی ئسک تانکہ وزیراعظم نا وژن نا رداٹ علاقائی واپاری کمک ئِ ودفنگ مرے۔ اوپارے کہ چمن اٹی پوسکن آ لینڈ پورٹ انا جوڑ جاڑ آن نہ صرف واپاری سرجزآتیٹی ودکی مریک بلکن اسمگلنگ نا گچین وڑاٹ روک تھام مننگ کے۔ مشترکہ گام گیج آتا رداٹ غٹ تعلقدار ادارہ غاک اسہ ایلو تون ڈیٹا شیئر کیرہ۔ اوپارے کہ 2014ءآن گڈ دا ساملک اٹی پدریسہ امن و سوگوی بننگ ئِ و سی پیک نا سوب ڈیہہ ٹی اسہ پوسکن ئُ بدلی اس رونما مننگ والا ئِ و داڈٹ انا بدولت بلوچستان مچ آ ڈیہہ تون منسلک مننگ والا ئِ ، سی پیک ڈٹ انا سوب نہ صرف بلوچستان شون نا مزل ئِ ترندی اٹ طے کیک بلکن دا ڈٹ مچ آ ملک انا شونہالی نا بنداو جوڑ مریک۔ اوپارے کہ دورہ بلوچستان اٹی واپاری سرجزو، بارڈر ایریا نا حالیت، مسافر ، ہندی بندغ و پوریاگر برادری ئِ مون تروک ویل آتا عملی جاچ ئِ ہلنگانے و معاملہ غاتا گچینی کن وزارت واپار نا کنڈآن جامع سفارشات مرتب کرسا وزیراعظم ئِ پیش کننگرہ تانکہ بارڈر ایریا نا علاقہ غاتیٹی کانودی واپار ، زائر و واپاری حلقہ و ہندی بندغ آتے گچین آن گچین آسراتی تننگ مرے تانکہ ایلو ملک آتیان بروک آ بندغ آتیا مثبت گام گیج آتاعملی تاثر تمے و پاکستان نا ہمسایہ ملک آتون دوستانہ وواپاری تعلقداری پین سوگو مرے۔ اوپارے کہ طورخم بارڈر مرے یا چمن بارڈر درملکی واپاری معاملہ غاک پدریسہ ریگولیٹ مننگ ئُ و مثبت گچینی بننگ ئِ۔
