اسلام آباد۔ 01 اگست (اے پی پی) وزیر مملکت پیٹرولیم مصدق ملک پارینے کہ پاکستان اٹ خیسن، پِتل تون اوار ایلو کیہی قیمتی معدنیات نا 6 ٹریلین ڈالر مالیت نا کوڑی ساڑی ءِ، دا وخت آ دنیانا مسہ بھلا کمپنی گوگل، ایپل و ایمیزون نا جم مالیت 6 ٹریلین ڈالر ءِ ، نن بروک آ منہ سال اٹی معدنیات نا برآمد آتے 5 ارب ڈالر اسکان ودفنگ خوانہ۔ نن معدنیات نا بشخ اٹی کاریم کروک آمہالو آن ساڑی 3 لکھ نا افرادی قوت ءِ دوگنا کننگ نا خواہندار اُن۔ داخیال آتا درشانی ءِ او سے شنبے نادے آ ’’ڈسٹ ٹو ڈویلپمنٹ‘‘ نا سرحال آن اڈ ہلوک سمٹ آن تران کرساکرے۔ اوپاکستان منرل سیکٹر و انرجی مکس نا حوالہ ءِ ترسا پارے کہ ننا تغ شونداری و شونہالی ءِ، ہندا وڑ اقتصادی شرح نموٹی ودکی و زرگزرانی شونداری نان ہدف آتا اہم بشخ ءِ۔ اوپارےکہ وسیلہ غاتیان خاطرخواہ فائدہ ہرفپننگ نا سوب آن نن شونداری نا رُمب اٹ پدی سلیسن۔ اوپارے کہ ننا تغ اٹ شونہالی، شونداری، اقتصادی نمو و الس نا شونہالی غٹ آن اہم ءِ۔ مصدق ملک پارے کہ وزیراعظم محمد شہباز شریف ملک انا الس نا شونہالی و شونداری نا وژن تخک ہراڑا نن غٹ عمل کننگ اُن، داتغ انا پوروی کن ننے روزگار فراوان کروئی مریک، کم کٹیا والا اسہ ملک اس مننگ نا سوب آن ننے بھلو کچ اسے آ روزگار فراوان کننگ نا گرج ءِ ہراڑان کم و نیامی درجہ نا کسبکار بندغ آتے روزگار نا فراوانی بنداوی اہمیت تخک، ہراڑان مخلوق تینا خاہوت و چناتیا زرکاری نا قابل مننگ کیک۔ معدنیات شونداری وشونہالی نا دوئی کننگ نا اسہ ذریعہ اسے۔
