اسلام آباد۔ 01 اگست (اے پی پی) وزارت توانائی نا سیکرٹری محمد محمود پارینے کہ پاکستان اٹ 92 چندی وڑنا نہادی معدنیات ارے، ملک اٹی 5 ہزار آن زیات کانڑ 3 لکھ آن زیات بندغ آتے روزگار فراوان کننگ ءِ، ہندا وڑ پِتل و خیسن نا اِرا بھلا ڈٹ آتیا کاریم برجاءِ بلوچستان اٹی لیتھیم و اوڑتون منسلک ایلو معدنیات آتا کانڑ کنی کن چندی کمپنی کاریم کننگ ءُ ، سمٹ اٹ 30 آن زیات ملک آتا ڈل آتا بشخ ہلنگ پاکستان اٹ معدنیات نا بشخ انا اہمیت نا ڈیک ءِ، پاکستان اٹ معدنیات نا بشخ اٹی زرکاری نا گیشتر و پرکشش وارخواہی ساڑی ءِ، نن پاکستان اٹ معدنیات نا بشخ اٹی پین قومی و جہانی کمپنی تا شریداری نا خواہندار اُن۔ داخیال آتا درشانی ءِ او سے شنبے نادے آ ’’ڈسٹ ٹو ڈویلپمنٹ‘‘ نا سرحال آن اڈ ہلوک سمٹ آن تران کرسا کرے۔ اوحکومت پاکستان و پیٹرولیم ڈویژن نا کنڈآن درملکی و مندوبین نا سمٹ اٹی بشخ ہلنگ نا ستاءِ کرسا پارے کہ پاکستان اٹ ترند رفتار شونداری و شونہالی نا گیشتر وارخواہی ساڑی ءِ، ہراڑکن غٹ بشخ آتا مربوط شریداری نا گرج ءِ، وزارت توانائی دا بابت چندی گام گیج کرینے ہرافتے ٹی خذمت آتا آب اٹ و گچین فراوانی کن جوان حکمت عملی نا رداٹ پالیسی نا جوڑ کننگ، ملک اٹی دوستانہ زرگزرانی چاگڑد کن گام گیج ہم اوار ءِ۔ اوپارے کہ پاکستان اٹ معدنیات نا بشخ آن فائدہ ہرفسا الس نا شونداری ءِ پک کننگ مریک۔ اوپارے کہ اینو نا سمٹ پاکستان نا شونداری نا پوسکن آ دور انا بناپک مریک۔ اوپارے کہ معدنیات صنعتی شونداری ٹی اہم کڑد ادا کننگ کیک و جہانی کہول آ معدنیات نا سپلائی چین نا سوگوی ٹی ہم کمکار مننگ کیک۔ اوپارے کہ پاکستان اٹ معدنیات نا بشخ اٹی زرکاری نا گیشتر و پرکشش وارخواہی ساڑی ءِ، سیکرٹری وزارت توانائی مستی پارے کہ گیگ بدل توانائی معدنیات نا بشخ انا پائیدار شوندساری ٹی اہم کڑد ادا کننگ کیک۔ اوپارے کہ قدرت پاکستان ءِ معدنیات نا دروشم اٹ زیباءُ ٹیکی اس تسنے۔ اوبشخ ہلوک آتے ملک اٹی ساڑی معدنیات نا بابت پارسا پارے کہ پاکستان اٹ 92چندی وڑنا نہادی معدنیات ارے، ملک اٹی 5 ہزار آن زیات کانڑ 3 لکھ آن زیات بندغ آتے روزگار فراوان کننگ ءُ، پاکستان اٹ پِتل و خیسن نا اِرا بھلا ڈٹ آتیا ہم کاریم برجاءِ ہرافتے ٹی ریکوڈک و سیندک ڈٹ اوار ءُ ہرا بلوچستان اٹی واقعءُ۔ ہندا وڑ نن کھیوڑہ ٹی بے، مسلم باغ اٹی کرومائیٹ و چمن نا علاقہ ٹی کولانا کانڑ کنی کننگ ءُ۔
