اسلام آباد۔ 01 اگست (اے پی پی) بیرک بورڈ کارپوریشن نا چیف ایگزیکٹیو آفیسر ڈاکٹر مارک بیسٹوو پارینے کہ ریکوڈک بھاز اہم ءُ ڈٹ اسے ، معدنی بشخ اٹی شونداری نا بھلو گنجائشت اسے، پاکستان نا الس 50 درسد و بلوچستان نا الس ءِ 25 درسد نا شریدار کننگانے، ساڑی آ دور اٹی مذاکرات آن بیدس جھیڑہ غاتا ایسر ممکن اف، کرہ ارض ءِ رکھ کننگ کن پدتموک زرگزران تے شون تننگ و نیزگاری نا چٹفوئی مریک۔ سے شنبے نادے آ پاکستان منرل سمٹ (ڈسٹ ٹو ڈویلپمنٹ) آن تران کرسا اوپارے کہ پاکستان اٹ اسپیشل انویسٹمنٹ فیسلی ٹیشن کونسل نا جوڑ کننگ ستاکڑزک۔ زرکاری آن حکومتی کٹیاتیٹی ودکی مریک و زرکاری آن منافع کٹیا کننگ مریک۔ اوپارے کہ نن انسانی وسیلہ غاتیٹی زرکاری کینہ۔ ریکوڈک نا معاہدہ حقی شریداری آ تالان ءِ و ننا است خواہی ءِ کہ میزبان ملک آتا الس تون شریداری کیر۔ ساڑی آ پوسکن آ دور اٹی مذاکرات آن بیدس جھیڑہ غاتا ایسرممکن اف۔ داہیت انا خوشی ءِ کہ ریکوڈک معاہدہ ٹی 50 درسد پاکستان نا الس نا ءِ و داڑان 25 درسد بشخ بلوچستان نا الس ءِ تننگانے۔ کانڑ کنی نا تاریخ اٹ اولیکو وار داوڑ معاہدہ مسنے۔ ریکوڈک پاکستان کن اسہ بھاز اہم ڈٹ و آخبت اٹ بلوچستان نا طالب علم آتے داوڑنا ڈٹ آتا لیڈرآتا وڑاٹ تیار کننگک۔ اوپارے کہ معدنی بشخ انا ہردھات سٹریٹجک اہمیت تخک۔ گرین انرجی ہم اہم ءِ۔ نن دا کرہ ارض ءِ اگہ رکھ کننگ خوانہ تو دنیا نا پدتموک زرگزران تے شون تروئی مریک و نیزگاری ءِ چٹفوئی مریک۔ داوخت آ دنیا ٹی صنعتی بشخ انا شونداری ءِ اہمیت تننگ انگ ءِ و سعودی عرب دا چرجوئی ٹی بھاز مون آٹے۔ اوپارے کہ معدنی بشخ اٹی شونداری نا بھلو گنجائشت اسے و پاکستان معدنی وسیلہ غاتیان شپ ءِ، دافتیان فائدہ ہرفنگ کن کروک آ کوشست ستاکڑزک۔
