اسلام آباد۔ 31 جولائی (اے پی پی) چیئرمین سینیٹ محمد صادق سنجرانی پارینے کہ انٹرنیشنل پارلیمنٹرینز کانگریس نا پوسکن آ ہیڈکوارٹر نا جوڑ کننگ ننا اسیجائی وژن نا ڈیک ءِ، دا اہم مزل کن ای وزیراعظم پاکستان محمد شہباز شریف نا مخ تفی نا است انا حب اٹ منت وارا ُٹ، وزیراعظم پاکستان نا پدریسہ مخ تفی و راہشونی آن آئی پی سی نا مسخت آتا دوئی کننگ اٹ سرسہبی دوئی مس۔ داخیال آتا درشانی ءِ او دوشنبے نادے آ انٹرنیشنل پارلیمنٹرینز کانگریس (آئی پی سی ) نا آخبتی ہیڈکوارٹر نا بنداو نا دود آن تران کرسا کرے۔ چیئرمین سینیٹ محمد صادق سنجرانی پارے کہ انٹرنیشنل پارلیمنٹرینز کانگریس نا پوسکن آ ہیڈکوارٹر نا جوڑ کننگ اسیجائی وژن نا ڈیک ءِ، دااہم مزل کن ای وزیراعظم پاکستان محمد شہباز شریف نا است انا حب اٹ منت واری ءِ ہرفیوہ، وزیراعظم پاکستان نا پدریسہ مخ تفی و راہشون آن آئی پی سی نا مسخت آتا دوءی کننگ اٹ سرسہبی دوئی مس۔ اوپارے کہ آئی پی سی نا مشن کن حکومت پاکستان نا بدل مفروک مخ تفی ستاکڑزک۔ و وزیراعظم پاکستان نا کنڈآن داادارہ نا جوڑ کننگ اٹ کمکاری و دااہم جاگہ غا داڑکن ڈغار نا فراوانی اونا ذاتی است خواہی نا شاہدی ءِ۔ چیئرمین سینیٹ پارے کہ نن غٹ انا ثابت گامی و پدریسہ کوشست آتا سوب آن آئی پی سی جہانی چیلنج آتون مون تننگ کن اسہ اہم ادارہ سے نا وڑاٹ مون آ بسنے۔ اوبین الپارلیمانی یونین نا صدر دوارتے پچیکو نا خذمت آتے خراج تحسین پیش کرسا پارے کہ اونا پبی کمک و است خواہی آن نئے بیرہ دا مشن ءِ سوگوی ملا بلکن دانا پوروی ٹی ہم اہم کڑد اس ادا کرینے، آئی پی سی نا تصور سینیٹ آن بناکرے و چنکو وخت اسے ٹی اسہ اہم پلیٹ فارم اس جوڑ مس ہرا اقوام عالم ءِ مون تروک چیلنج آتا ایسری کن گچین روڈمیپ اس فراوان کرے۔ اوپارے کہ اقوام عالم ءِ مون تروک چیلنج ہرافتے ٹی امن و ایمنی نا قیام، زرگزرانی سوگوی ءِ پک کننگ و چاگڑدی تغیرات نا چیلنج آتون مون تننگ کن لائحہ عمل اس مرتب کننگ کن پلیٹ فارم اس دُوبریک۔ محمد صادق سنجرانی پارے کہ آئی پی سی 50 ملک آتا 193 پارلیمنٹ نا باسک آتے اسہ نقطہ نظر آ یکجا کرینے و جہانی چیلنج آتے ڈائیلاگ نا کمک اٹ ایسر کننگ کن کوشست کننگ ءِ، جہانی مکالمہ و کمکاری نا است بڈی ءِ کننگ اٹ دانا بنداوی پلو اسے۔ دانا پنی آ اشاعت ’’دی پارلیمنٹرین ‘‘ ءِ۔ محمد صادق سنجرانی آئی پی سی نا بنداو نا دود اٹی بشخ ہلنگ آ آئی پی یو نا صدر نا منت واری ءِ ہم ہرفے۔ اوآئی پی یو نا پارلیمان تا نیام اٹ ڈائیلاگ و کمکاری ءِ ودفنگ اٹ کوشست آتے امنا کرے۔ اوڑدہی ٹی سینیٹ نا قائمہ کمیٹی پیٹرولیم نا چیئرمین سینیٹر عبدالقادر، سینیٹر مہمان داری سینیٹر ذیشان خانزادہ، سیکرٹری جنرل آئی پی سی ستارہ ایاز و سیکرٹری سینیٹ محمد قاسم صمد خان آن بیدس بڑزکو کمامدار و آئی پی یو ڈل انا باسک آک ہم ساڑی ئسر۔ آئی پی یو نا صدر سینیٹ میوزیم نا دورہ ءِ ہم کرے ہراڑے اودے پاکستان نا جمہوری عمل، آئینی سفر و بڑزکو ایوان نا ارتقائی عمل نا بارواٹی ہم حوال تننگا۔ آئی پی یو نا ڈل انا شرف اٹی ڈپٹی چیئرمین سینیٹ سینیٹر مرزامحمد آفریدی پارلیمنٹ ہاؤس اٹی دِے انا اِرغ اس ہم تس۔
SMH
