اسلام آباد۔ 31 جولائی (اے پی پی) بنجائی وزیر توانائی انجینئر خرم دستگیرخان پارینے کہ ساڑی حکومت ملک اٹی 5063 میگاواٹ پوسکن بجلی سسٹم اٹ اوار کرینے، وزیراعظم محمد شہباز شریف 1263میگاواٹ نا بناءِ کرے وخت اس کہ مسکوہی حکومت مجرمانہ غفلت کرسا دا ڈٹ ءِ تاخیر نا گواچی کرے۔ دوشنبے نادے آ پریس کانفرنس کرسا خرم دستگیر پارے کہ تھراناکولاآن 1980میگاواٹ بجلی نا پیدوار بناکرے ہرا ملکی تاریخ اٹ اہم مزل نا نشان ءِ۔ اوپارے کہ شنگھائی الیکٹرک، کروٹ و کراچی ٹی ہم بجلی پیدوار نا ڈٹ آتا بناءِ کرے ہراڑان بجلی نا پیدواری لائخی ٹی ودکی مس۔ اوپارے کہ ایران آن جیونی گوادرا سکان بجلی نا لائن نا ڈٹ انا بناءِ کننگا، تھرمٹیاری نا ٹرانسمیشن لائن ءِ پورو کرسا چلیفنگا۔ بنجائی وزیر پارے کہ سکھی کناری، لاہور نارتھ ٹرانسمیشن لائن نا بنداو ءِ تخنگانے۔ خرم دستگیر پارے کہ تدوک آ دور ءِ حکومت اٹ ملکی تاریخ نا غٹ آن بھلا گردشی وام ئسک، ساڑی حکومت نا دور اٹی اوٹی نمان کمتی مس۔ اوپارے کہ سی 5 نیوکلیئر پاور پلانٹ نا معاہدہ غا دستخط مسنے و شمسی توانائی نا ڈٹ آتیکن ہم فریم ورک اس جوڑ کننگانے ہراڑان بروک آ حکومت ءِ فائدہ ملکگ۔ خرم دستگیر پارے کہ 200 یونٹ اسکان بجلی کاریم اٹ اتوک آتیکن بجلی نا نہاد اٹی ودکی کننگتنے۔ اوپارے کہ برجاسال ملک اٹی لوڈشیڈنگ نا بابت حالیت گچین ئسک۔
