اسلام آباد۔26جولائی (اے پی پی):مزن گس ءِ یکجاہی دیوان ءَ بازیں سیاسی گلانی باسکانی شورء ُ صلہ آنی سرءَ ھیال ءُ لیکہ ءِ درشانی کتگء ُ جیڑہ ء ُجنجال پدر کتگ اَنت۔ چارشمبے ءِ روچءَ مزن گسءِ یکجاہی دیوان ءَ نکتہ اعتراض ءِ سرءَ راجی اسمبلی ءِ باسک قادر خان مندوخیل ءَگشتگ کہ قرآن کریم ءِ بے شرپی ءِ وئیلانی حلاپ ءَ اے دیوان ءَ تپاک نامہ بہ ایت اِنت، ما مسلمان اقلیتی براتی ءِ پاکیں کتابانی شرپ ء ُ عزتءَ کناں، بلے روبرکت ءَ مئے پاکیں کتابانی بے شرپی کنگ بوہگءَ اِنت، اے وڑیں ملک آنی حلاپ ءَ سویڈن ء ُ ایندگہ ملک آنی سفیرآناں دری کارانی کارگس ءَ توار کنگ بہ بیت ء ُ ترندیں زھرشانی کنگ بہ بیت ءُ ا ے سفیرآناں ملک ءَ چہ درکنگ بہ بیت، اے وڑیں ملک آنی سفارتی سیادی ءِ ایچ پائدگ نیست۔ اسپیکر راجہ پرویز اشرف ءَ گشتگ کہ سویڈن وئیل ءِ سرءَ یکجاہی تپاک نامہ پاس بوتگ، سرجمیں ایوان ءَ اے وئیل ءَ را ایر جتگ۔ سینیٹر دنیش کمار ءَ گشتگ کہ کچہ ءِ ڈُنگاں یک مندرے ءِ تہا پروشتءُ پروش کتگ، سندھ ء ِ ڈُنگاں ہندو براتی ءَ را دھمکی داتگ کہ سیما حیدرءَ را شما ملک ءَ واتر بیاراِت۔ آئیءَ گشتگ کہ پاکستان ءَ نندوکیں ہندو اے ملک ءَ را وتی مات لیک اَنت ء ُ اے ملک ءِ ھاترءَ مئے حون ہم حاضر اِنت۔ سینیٹر ہدایت اللہ ءَ گشتگ کہ ضلع خیبر ءَ ناشرکاری ءِ وئیل ءَ یک اے ایس آئی شہید بوتگ ء ُ مسیت ہم شہید بوتگ، مروچاں خیبر پختونخوا ءَ ناشرکاری نوک بوتگ، ما یک بیمناکیں جاورھالے ءِ نیمگءَ رؤگءَ اَنت، اے این پی ءَ ناشرکاری ءِ حلاپ ءَ قربانی داتگ۔
