کراچی۔26جولائی (اے پی پی): مزن وزیر محمد شہباز شریف ءَ گوشتگ کہ پاکستان ڈیفالٹ ءِ بیم ءَ چہ در کپتگ، جادو گری کنوک ءُ چُپ ءُ چاپ کنوکیں ملک ءِ بدواھ ناکام بوتگ انت۔ دیمروئی ءِ واستہ کرپشن ، توان ءُ گیس دزئی ءِ ھلاسی کنگ لوٹ ائیت، ورنا آناں بلدکار ءُ وت مستر جوڑ کنگی انت، آیوکیں الیکشن ءَ موہ رست گڈا صوبگ آنی گوما یکجا ئی ءَ ورنا آناں ھمک سال 10 لکھ لیپ ٹاپ بھر ءُ بانگ کناں۔ اے ھیالانی درشانی آئی ءَ چار شمبے ءِ روچ ءَ ادا مزن وزیر لیپ ٹاپ سکیم ءُ مزن وزیر یوتھ بزنس لونز ءِ چیر دستی ءَ چیک بھر ءُ بانگ کنگی مراگش ءَ گشتانک دیان ءَ کت۔ اے موہ ءَ وزیر ءِ اھوالکاری ءُ شنگ کاری مریم اورنگزیب ، بنجاھی وزیر انفارمیشن ٹیکنالوجکی امین الحق، بنجاھی وزیر ربائے ھاٹیگ انجینئر خرم دستگیر، گورنر سندھ کامران ٹیسوری، سر وزیر مراد علی شاہ، مزن وزیر ءِ ھاسیں کمکار برائے ورنا آنی کار شزہ فاطمہ ءُ صوبائی وزیر ءَ ابید ورنا آنی مزنیں کساس ءِ ساڑی ات۔ مراگش ءَ گوں گشتانک دیان ءَ مزن وزیر ءَ گوشت کہ ورنا آناں لیپ ٹاپ بھر ءُ بانگ کنگ ءُ آواناں وت مستر جوڑ کنگ ءِ مراگش ءَ بھر زوری منی واستہ لائک ء ستا انت۔ سندھ ءِ سر وزیر صوبگ ءَ لیپ ٹاپ آنی بھر ءُ بانگ ءُ دیمروئی آسراتی پجاری کنگ ءِ واستہ کوشست ءَ انت۔
