راولپنڈی۔ 22اپریل (اے پی پی) پاک فوج انا سروک جنرل سید عاصم منیر چنکا عئید انا اولیکو دے ءِ باجوڑ، خیبرپختونخوا ٹی پاک اوغان بارڈر آ تعینات فوجی ورناتے تون گدریفے، آرمی چیف آفیسر و ورناتتون عئید انا نماز ءِ خوانا و اوفتا بڑزکو حوصلہ نا ستاءِ کرے۔ آئی ایس پی آر نا رداٹ داوخت آ پاک فوج انا سروک پارے کہ پاک فوج سیم تا دفاع کن سنبرینگوک ءِ و پاکستان نا فوج ملکی سالمیت ءِ پک کننگ کن ہروڑنا خطرہ ءِ بے سہب کننگ کن ہروخت تیار ءِ۔ اوپارے کہ پاکستان نا محافظ آک سخت انگا کسر، سخت موسمی حالیت و تینا دوست آتیان مُر مننگ آن پد ہم ، تینا فرض ءِ مقدم تخرہ، انتئے کہ سیم تا رکھ آن زیات مقدس ہچ اس اف۔ آرمی چیف شہید آتے زبردست خراج تحسین پیش کرے و زور شاغا کہ عئید انا دے ننے لمہ وطن نا دفاع و دہشت گردی نا لعنت نا چٹفنگ کن تینا جون تے ندرکروک آتے اسُل است آن دپن۔ آرمی چیف خصوصی وڑاٹ شہید آتا خاہوت کن نیک است خواہی نا درشانی ءِ کرے۔ داکان بیدس، آرمی چیف ورناو آفیسر آتا آپریشنل تیاری و مستعدی نا ہم ستاءِ کرے۔ داکان مست بننگ آ کور کمانڈر پشاور آرمی چیف ءِ بخیر کرے۔
