اسلام آباد۔ 21 اپریل (اے پی پی) اسپیکر قومی اسمبلی راجہ پرویز اشرف و ڈپٹی اسپیکر زاہد اکرم خان درانی عئید انا خوشی نا وخت آ امت مسلمہ و پاکستانی قوم ءِ مبارکبادی ترسا پارینو کہ چنکا عئید خوشی و شکر انا دے ءِ۔ اینو نا دا خوشی نا وخت آ نن اللہ تعالیٰ نا شکر ءِ ادا کرین ہراننے روچہ نا تُو اٹی روچہ تخنگ، عبادت کننگ نا توفیق و بے سیبو و حاجت مند آتا کمک ءِ کننگ نا موقع عطا کرے۔ چنکا عئید آ تیان کلہو اٹی اسپیکر قومی اسمبلی راجہ پرویز اشرف پارے کہ عئید انا دے ننا غٹ اکن خوشی نادے اسے ولے اونا حقی خوشی ہمووخت آ مریک ہراتم نن راج انا بے سیبو، ضرورت مند و خصوصی بندغ آتا گرج آتا خیال ءِ تخن، و اوفتے تینا خوشی تیٹی اوار کین۔ اواسہ آسودہی اسلامی راج اسے نا ٹہیفنگ کن اسہ ایلو نا رنجش و اختلاف آتے است آن درسا ہم آہنگی و ایلمی ءِ مون آ دننگ نا گرج آ زور شاغا۔ اسپیکر پارے کہ اینو نا دے استءِ ہروڑنا کدورت و رنجش آتیان پاک کرسا اللہ تعالیٰ آن ملک انا شونداری و شونہالی و سوگوی و امت مسلمہ نا سیوت و یکجہتی کن دعاخواہنگ نادے ءِ۔ اسپیکر ملک ءِ مون تروک چیلنج آتا مقابلہ ءِ کننگ کن قوم ءِ تینا صف آتیٹی ہم گرنچی، یکجہتی ءِ قائم کننگ و متحد مننگ نا گرج آ زور شاغا۔
