اسلام آباد۔ 20 اپریل (اے پی پی) وزیراعظم محمد شہباز شریف پارینے کہ آئین نا پاسداری و شرف کن غٹ ادارہ و مچ آ قوم ءِ یکسو مروئی تمک، آئین پارلیمان نا گود آن ودی مس، عدلیہ آئین ناتشریح ءِ کننگ کیک ولے ’’ری رائٹ‘‘ کننگ کپک، دنیا ٹی اسہ جاگہ اس ہم دُن ءُ درور اس اف کہ پارلیمان نا کانود، وخت اس کہ داسکان او معرض وجود اٹی ہم بف، آ عدالت حکم امتناعی جاری کے، نن انشاء اللہ تینا سیاسی میراتءِ ریاست بچفنگ نا خاطر قربان کننگ اٹ زرس ہم پدی مفنہ۔ او پنچ شنبے نادے آ داڑے آئین پاکستان 1973 نا موبائل ایپ انا جاری کننگ نا دودآن تران کریکہ۔ داوخت آ بنجائی وزیر حوالکاری و شینکاری مریم اورنگزیب ، بنجائی وزیر داخلہ راناثنا ء اللہ ئسک ہم ساڑی ئسر۔ وزیراعظم شہباز شریف پارے کہ آئین نا ڈیجیٹل ایپ آ دستیاب مننگ آن طالب علم و کروڑ آ پاکستانی آئین نا منشا و آئین پاکستان نا بنداوی اساس آن فائدہ ہرفنگ کیرہ۔ اوپارے کہ داحسن اتفاق ءِ کہ ای 12 اکتوبر 1999 آ پی ٹی وی نا دابلڈنگ آن گدرینگاٹ ہراتم اسہ غیر آئینی گام اس ہرفنگاسس و اینو الحمداللہ آئین نا شرف و آئین نا شق آتے ہر خاص و عام اسکان سرکننگ کن دُوارہ دا ماڑی ٹی ساڑی اُٹ۔ دا آئین نا بانیک ہرافتے ٹی مسکوہی وزیراعظم ذوالفقار علی بھٹو،مفتی محمود ایماندار، مولاان شاہ احمد نورانی ایماندار، خان عبدالولی خان کون آ قدآور شخصیت آک ئسر ہرا تینا سیاسی سوچ انا رداٹ تینا جماعت آتا کماشی ءِ کریرہ ولے آئین پاکستان کن اوفک تینا غٹ تر اختلاف آتے اسہ پلو تخسا داآئین ءِ جوڑ کریر و ہنداوڑ رہ ہینگوک دنیا اسکان دانا پن مدام روشنا لوز آتیٹی یات تخنگک۔ وزیراعظم پارے کہ اینو ولدا آئین نا پاسداری و شرف کن غٹ ادارہ و مچ آ قوم ءِ یکسو مروئی تمک، آئین پارلیمان نا کٹ آن ودی مس، آئین نا تشریح ءِ عدلیہ کننگ کیک دا اونا اختیار ءِ ولے عدلیہ آئین ءِ ’’ری رائٹ‘‘ کننگ کپک، دا بیرہ پارلیمان نا اختیار ءِ و دا بیرہ پاکستان اٹی آخا بلکن مچ آ دنیا ٹی اصول مسلمہ ءِ۔ وزیراعظم پارے کہ اینو پاکستان اسہ دورائے سے آ سلوک ءِ، کنتون اوار نن سیاستدان تیان بے شمار ردینک مس و بھلاک ہموفک مریرہ ہراتینا ردینک آتیان سبخ اس ہیل کرسا مون آ کارہ و قوم انا بڑزکو و ارفع مسخت آتیکن تینا ذات ءِ قومی فائدہ غاتے تابع کیرہ۔ وزیراعظم پارے کہ یقینا نن سبخ ہیل کرینن و انشاء اللہ نن پاکستان نا مشکل آ حالیت آتے سہی کننگ کن دے و نن کوشست کننگ کینہ و کننگ اُن۔ وزیراعظم بنجائی وزیر حوالکاری و شینکاری مریم اورنگزیب ، بنجائی وزیر داخلہ رانا ثناء اللہ، اسپیکر قومی اسمبلی راجہ پرویز اشرف، پاکستان نا پارلیمان و نادرا نا کمامدارآتا منت واری ءِ ہرفسا پارے کہ پاکستان نا آئین نا 50 می سال دے انا وخت آہراگام گیج آتے کننگا او ستاکڑزرہ۔ وزیراعظم داگمان نا درشانی ءِ کرے کہ ننا ورناچین آئین نا دا کتاب نا جوان وڑاٹ مطالعہ ءِ کیک، اودے یات کیک و اوڑا تعلیمی ادارہ غاتیٹی شرہ مریک ہراڑان کانود و آئین نا حکمرانی قائم مریک۔ وزیراعظم پارے کہ ای اینو داڑے آئین نا پاسداری و سوگوی کن بسونٹ، 12اکتوبر 1999 آ ہراتم ای داکان گدرینگاسٹ تو اوہ اسہ تہار ءُ نن اس ئسک۔ اودعا کرے کہ اللہ تعالیٰ پاکستان ءِ مدام آباد تخے۔
