اسلام آباد۔ 20 فروری (اے پی پی) الیکشن کمیشن ایوان صدر ءِ تینا 19 فروری آ نوشتہ کروک آ چٹھی ءِ تینا موقف گوندسا پارینے کہ آئین نا رداٹ صوبائی اسمبلی اسے نا تحلیل مننگ نا دروشم اٹ پولنگ نا تاریخ تننگ نا الیکشن کمیشن تون واکداری اف، پنجاب و خیبرپختونخوا اسمبلی تا گچین کاری تا بابت چندی درخواست آک عدالت آتیٹی زیر سماعت ءُ ہنداخاطران الیکشن کمیشن داوڑنا حالیت آتیٹی صدر مملکت نا آفس تون اسہ وڑاسے نا ہم سلابتی عمل نا قابل اف۔ الیکشن کمیشن نا کنڈان جاری اعلامیہ نا رداٹ دوشنبے نادے آ الیکشن کمیشن نا دیوان مس ہنداخاطران دا دیوان آن پد ہم الیکشن کمیشن ہمو مودبانہ گزارش کیک ہرادے تدوک آ چٹھی ٹی کننگاسس۔ داکان مست الیکشن کمیشن نا کنڈان یک شنبے نادے آ صدر پاکستان نا سیکرٹری نا پن الیکشن کمیشن نا سیکرٹری نا کنڈان نوشتہ کروک آ چٹھی ٹی پاننگاسس کہ صدر نا عہدہ ریاست نا غٹ آن بھلا آئینی عہدہ ءِ، کمیشن اونا بھاز شرف ءِ کیک۔ چٹھی ٹی پاننگاسس کہ صوبائی اسمبلی تا تحلیل مننگ آن پد الیکشن کمیشن ہڑتوم آ اسمبلی تا گورنر آتیان گچین کاری کن تاریخ خواہس ولے داسکان دا تاریخ ءِ تننگ تنے۔ کمیشن لاہور ہائی کورٹ نا فیصلہ ءِ مون آ تخسا صوبہ ٹی لس گچین کاری تاریخ نا بابت گورنر پنجاب تون اوڑدہی کرے ولے گورنر پنجاب دا موقف ءِ تینا کرے کہ او لاہور ہائی کورٹ نا فیصلہ غا عملدرآمد نا پابند اف اتنئے کہ اودے بطور گورنر داڑان استثنیٰ دوئی ءِ دابناآ کمیشن لاہور ہائی کورٹ آن پین راہشونی ہم بٹنگانے وخت اس کہ پشاور ہائی کورٹ اٹی گچین کاری تا اڈتننگ نا تاریخ نا بابت مسہ درخواست زیر سماعت ءُ۔ کمیشن چٹھی ٹی وضاحت کرے کہ آئین الیکشن کمیشن ءِ دا واکداری تفک کہ او صوبائی اسمبلی اسے نا گورنر نا کنڈان تحلیل یا آئین نا آرٹیکل 112 ون انا رداٹ اسمبلی تا تحلیل مننگ نا حالیت اٹ ازخود گچین کاری تاتاریخ ایتے۔ دا سوب آتا بناآ و باندات نا عدالت اٹی زیر سماعت مننگ نا سوب آن معذرت اتون الیکشن کمیشن صدر نا آفس تون سلابت نا قابل اف۔
