اقوام متحدہ۔ 14 فروری (اے پی پی) اقوام متحدہ نا سیکرٹری جنرل انتونیوگوتریس پارینےکہ شام انا صدر بشارالاسد زمی جمب نا سوب آن زہمی بندغ آتے امداد نا فراوانی کن پین 2 بارڈر کراسنگ آتے ملنگ آ امنا کرینے۔ فرانسیسی خبررساں ادارہ نا رداٹ اوپارے کہ دا کراسنگ پوائنٹ آتے ملنگ آن انسانی ہمدردی نا بنداو آ امداد اسکان رسینگ، ویزانا منظوری تیٹی ترندی اتنگ و حب انا نیام اٹ سفر ءِ آسان کننگ تون اوار اوار شام اٹی پین امداد ءِ ترندی اٹ داخل مننگ نا موقع ملک۔ اوپارے کہ شامی صدر بشارالاسد ترکی آن قطب دیکی شام اسکان باب السلام و الراعی نا اِرا کراسنگ پوائنٹ آتے بنائی 3 تُو اکن ملنگ آ رضامندی ظاہر کرینے تانکہ انسانی امداد نا وکت آ ترسیل نا موکل تننگ مرے۔ اوپارے کہ زمی جمب آن مرک آتا کچ داسہ ہم ودنگ ءِ و جنگ زدہ شام اٹی زہمی بندغ و یخ آتا سخت حالیت آتون مون تروک زندہ بچوک آ بندغ آتا دمدستی کمک تون اوار اوار لکھ آ بندغ آتے خور، جان جوڑی، غذائیت، رکھ، پناہ گا، یخ آن بچفنگ و زند ءِ بچفوک آ ایلو گڑاتا فراوانی نا دمدستی گرج ءِ۔
