اسلام آباد۔ 18مئی (اے پی پی) ریاست و سیمی امور نا بنجائی وزیر جنرل (ر) عبدالقادر بلوچ پارینے کہ ذرائع ابلاغ نا ذریعہ دا تاثر ئِ تننگ نا کوشست کننگانے کہ وزیراعظم اودے ٹیلی فون نا ذریعہ فاٹا نا بابت کانودسازی نا معاملہ غاتے توننگ نا حکم تسنے، دا راست اف، فاٹا نا بابت کانودسازی ٹی اشتافی کپننگ نا خواست تعلقدار کمیٹی نا باسک آک کرینو، دابابت نن فاٹا باسک آتون ہیت کرینن ہرافتا اصرار ئِ کہ رواج ایکٹ آن مست فاٹا نا انضمام اٹی اشتافی کننگے۔ پنچ شنبے نا دے قومی اسمبلی ٹی اپوزیشن باسک آتا کنڈآن فاٹا اصلاحات نا بابت چست کروک آ ٹک آتا ورندی ٹی ریاست و سیمی امورنا بنجائی وزیر جنرل (ر) عبدالقادر بلوچ پارینے کہ نن ہراآئین نا سوغند ئِ ہرفینن اونا پابند اُن۔ اوپارے کہ آئین نا آرٹیکل (1) نا رداٹ قبائلی علاقہ غاتے بنجانا بست وبند اٹی علاقہ پاننگانے۔ آئین اٹی بلوچستان و صوبہ خیبر پختونخوا نا قبائلی علاقہ غاتا ستاکننگانے۔ صدر مملکت ئِ آئین نا رداٹ اختیار دوئی ئِ کہ صدرپاکستان قبائلی علاقہ غاتا بابت قبائلی جرگہ نا سفارش آتیا انت کہ چائے فیصلہ اس کننگ کیک۔ دا مچ آ کارروائی قبائلی جرگہ نا سفارش آتے مون آ تخسا کننگا۔ سفارش آتا 36ٹک آتیان اسہ ٹک اسے کہ پنچ سال انا مداٹی فاٹا نا انضمام مریک و اسہ ٹک اس داہم ارے کہ ایف سی آر چٹک۔ داڑکن نن ریگولیشن آن بیدس رواج ایکٹ ئِ ایوان اٹی پیش کرین۔ بل قائمہ کمیٹی ٹی ہنانے و رپورٹ بننگ آن پد قومی اسمبلی ٹی پیش مریک۔ کمیٹی نا باسک آک پارینو کہ اودے فاٹا نا بابت معاملہ غاتا جاچ ئِ ہلنگ نا وخت تننگے و اشتافی کننگپ۔ تدوک آدے وزیراعظم و مولانا فضل الرحمان نا نیام اٹ ٹیلی فون آ ہیت انا تاثر تننگانے نئے وزیراعظم کنے پارت اس کرینے۔ اوپارے کہ ننا کمیٹی نا باسک آتون ہیت مسنے تانکہ رواج ایکٹ نا خدوخال آ ہیت کرسا دادے گڈیکو دروشم اس تننگ مرے۔ تدوک آ دے فاٹا نا باسک آتون ہیت مسنے۔ اوفتا خیال دادے کہ اول فاٹا نا نضمام ئِ گڈیکو دروشم اس تننگے، رواج ایکٹ ایف سی آر نا نعم البدل ئِ۔ اوپارے کہ نن سیوتی تے اوار درسا ہنوئی ئِ ولے سیوتی تا کنڈآن حکومت آ ہچ ئُ دباﺅ اس اف۔ فاٹا ٹی دہ سالہ شونداری کاریم نا بنائِ کننگ اُن۔ نن اہم کانود سازی ئِ اشتافی اٹ کننگ خواپنہ۔
