اسلام آباد۔ 29 دسمبر (اے پی پی) اسپیکر قومی اسمبلی راجہ پرویز اشرف پارینے کہ پاکستان تحریک انصاف (پی ٹی آئی ) نا استیفہ غاتے پک کننگ نا بابت آئین، کانود و قومی اسمبلی نا قاعدہ و ضابطہ نارداٹ فیصلہ کننگک، استیفہ غاتے پک کننگ کن پی ٹی آئی نا غٹ باسک آتے انفرادی وڑاٹ بٹنگک۔ پنچ شنبے نادے آ پی ٹی آئی نا ڈل اسپیکر قومی اسمبلی راجہ پرویز اشرف تون پارلیمنٹ ہاؤس اٹی مسکوہی اسپیکر اسد قیصر نا کماشی ٹی اوڑدہی کرے۔ ڈل اٹی مسکوہی ڈپٹی اسپیکر قاسم خان سوری، ملک عامر ڈوگر، امجد خان نیازی، فہیم خان، ڈاکٹر شبیر حسن، لعل ملہی ،عطاء اللہ و طاہر اقبال ئسک اوار ئسر۔ اوڑدہی ٹی پی ٹی آئی نا قومی اسمبلی آن استیفہ غاتا بابت گپ وتران کننگا۔ داوخت آ گپ وتران کرسا اسپیکر قومی اسمبلی راجہ پرویز اشرف پارے کہ سیاست اٹی درگہ غاتے بند کننگپک بلکن سیاست دان تا نیام اٹ رابطہ بایدے مرے۔ اوپارے کہ استیفہ غاتے پک کننگ نا بابت آئین، کانود و قومی اسمبلی نا قاعدہ و ضابطہ نا رداٹ فیصلہ کننگک و پی ٹی آئی نا غٹ باسک آتے انفرادی وڑاٹ بٹنگک۔ اوپارے کہ مہالو ہم پی ٹی آئی نا باسک آتے استیفہ غاتے پک کننگ کن بٹنگ انگاسس۔ راجہ پرویز اشرف نا پاننگ ئس کہ پی ٹی آئی نا کراچی آن اسہ اسمبلی نا باسک اس استیفہ نا منظوری ءِ توننگ کن ہائیکورٹ تون رجوع کریسس۔
