اسلام آباد۔ 29 دسمبر (اے پی پی) دفترخارجہ نا ترجمان ممتاز زہرہ بلوچ پارینے کہ پاکستان اقوام متحدہ نا سلامتی کونسل نا تعلقدار قرارداد آتا رداٹ جموں وکشمیر نا جھیڑہ نا ایسری کن ہرممکن کوشست آتے برجاتخک۔ پنچ شنبےنادے آ ہفتہ وار پریس بریفنگ اٹی اوپارے کہ اینخو سال اٹی ہم بھارت کشمیری تا اوفتا حق و آجوئی ناجہد ءِ توننگ کن فوجی طاقت ءِ کاریم اٹ اتسا کرینے۔ پاکستان مچ آ سال اٹی غٹ تعلقدار ہڑتوم آ کنڈآتا و علاقائی فورم آتون اوار اوار جہانی کہول آ ہم کشمیری الس کن توار بڑزکرے، پاکستان بھارت نا غیرکانودی وڑاٹ کوزہ ٹی جموں وکشمیر اٹی انسانی حق انا بھلا خلاف ورزی تا چٹفنگ و کشمیری الس نا است خواہی و اقوام متحدہ نا سلامتی کونسل نا تعلقدار قرارداد آتا رداٹ اسہ انصاف اٹ ایسری نا خواست کرینے۔ اوپارے کہ اوآئی سی وزراء کونسل نا 48 می دیوان و جموں وکشمیر آ او آئی سی رابطہ ٹولی جموں وکشمیر نا جھیڑہ غا اہم قرارداد آتے منظور کرے و ایکشن پلان آ امنا کرے۔ ترجمان پارے کہ داسال 11 دسمبر آ او آئی سی نا سیکرٹری جنرل مظفرآباد و لائن آف کنٹرول نا دورہ ءِ کرے ہرا بھارت نا غیرکانودی کوزہ ٹی جموں وکشمیر نا حالیت آتا بارواٹی تنظیم نا پدریسہ گڑتی نا اسہ پین درشانی اس ئسک۔ اوپارے کہ پاکستان اقوام متحدہ نا سلامتی کونسل نا تعلقدار قرارداد آتا رداٹ جموں وکشمیر جھیڑہ ناایسری کن ہرممکن کوشست آتے برجاتخک۔
