اسلام آباد۔1دسمبر (اے پی پی): مزن وزیر شہباز شریف ءَ گوشتگ کہ پاکستان ءَ شرم الشیخ کانفرنس ءَ سیلاپ ءِ سبب ءَ تاوان ءُ ڈکال ءِ ایجنڈا آناں جوانیں رنگ ءَ سہرا کتگ ایشی ءِ نتیجگ ءَ لاس اینڈ ڈیمیج فنڈ ءِ برجائی ءِ کار بوتگ، اے یک ٹوھیں گامگیج ات، پاکستان ءِکیس موسمی انصا انت ، ھیرات ناں۔ نوک دیمروئی کنوکیں ملک آنی نیمگ ءَ ماحولیاتی مٹ ءُ بدلی ءِ جیڈھ آناں قبول کنگ وشیں گپ ات پدا ھم اے رد ءَ کتگیں سوگند آناں پکو کنگ المی انت۔ آ شرم الشیخ ءَ بوکیں کاپ 27 کانفرنس ءِ ساھت ءَ پاکستان ءِکامیاتیں موسمی سفارتکاری ءِ سیادی داروکیں ادارگ ءُ میاں اوستمانی شریکداری ءِ کوشست آناں سہرا کنگ ءِ واستہ پنچ شمبے ءِ روچ ءَ ادا برجم بوھوکیں دیوان ءَ گشتانک دیانءَ کت۔ مزن وزیر ءَ گوشت کہ پاکستان ءَ را استیں سیلاپ ءَ چہ بازیں تاوان بوتگ، 33 ملین مردم آماچ بوتگ انت، 1800 مردم بیران بوتگ انت وھدیکہ کشت ءُ کشار، صنعت ، لائیو سٹاک، انفراسٹرکچر ءَ ھوار 30 ارب ڈالر ءِ کد ءَ تاوان بوتگ۔ آئی ءَ گوشت کہ پاکستان ءِ سیلاپ ءِ آماچیں مردم آنی کمک کنوکیں توامیں ملک آنی شگر ءُ منت واری ءَ گراں۔ سکیں ساھتءَ آوانی کتگیں کمک آناں مدام یات کنگ بیت۔ مزن وزیر ءَ گوشت کہ پاکستان ءِ توک ءَ سیر لاپیں مردم ءُ گہبودی ادارگ آں آماچیں مردم آناں گوں دل ءِ جھلانک آں کمک کت ھمے رنگ ءَ توامیں صوبگ ھاسیں رنگ ءَ سندھ ءُ بلوچستان ءِ حکومت ءَ آماچیں مردم آنی کمک کت۔ آئی ءَ نیشنل ڈیزاسٹر منیجمنٹ اتھارٹی ءُ ڈیزاسٹر منیجمنٹ ءِ صوبائی ادارگ آنی کوشست آنی توسیپ ھم کت۔ آئی ءَ گوشت کہ وزیر ءِ درئی کار بلاول بھٹو ، وزیر ءِ موسمی مت ءُ بدلی شیری رحمان ءُ وزیر ءِ اھوالکاری مریم اورنگزیب ءَ کاپ 27 ءِ میاں اوستمانی فورم ءِ سر ءَ پاکستان ءِ بن گپ ءَ را سہرا کنگ ءَ جوانیں کوشت پیلو کت۔ آئی ءَ گوشتکہ موسمی مٹ ءُ بدلی آنی سبب ءَ ھور ءَ چہ پاکستان ءَ بے کساس تباہی بوتگ چوش کہ موسمی مٹ ءُ بدلی ءِ سبب ءَ جوڑ بوھوکیں گیس آنی یلو بوھگ ءَ چہ پاکستان ءِ بھر یک درسد ءَ چہ کم انت، مئے واھشت ءُ دعا انت کہ ایش پاکستان ءَ بوتگ ایش دگہ ملکے ءِ گوما بہ بوتیں پدا اے یک راستیں گواچن ات کہ موسمی مٹ ءُ بدلی آنی رند پد ءُ ایشی ءِ نتیجگ ءَ بوھوکیں ڈکال سیم سر آنی منت وار نہ انت۔ مزن وزیر شہباز شریف ءَ گوشت کہ اے اولی رند ءَ بوتگ کہ پاکستان ءِ گوانک ءَ را میاں اوستمانی تک ءَ اشکنگ بوتگ ایش آوانی کوشست ءِ بدولت ءَ لاس اینڈ ڈیمیج فنڈ ءِ برجائی بوتگ اے ھوالگ ءَ چہ وزیر ءِ درئی کار بلاول بھٹو ءُ وزیر ءِ ماحولیاتی مٹ ءُ بدلی شیری رحمان ءِ کراد لائک ءِ ستا انت۔ آئی ءَ گوشت کہ پاکستان ءِ کسی موسمی مٹ ءُ بدلی انصاف ات ، ھیرات ءَ نہ رستگ۔ آئی ءَ گوشت کہ موسمی مٹ ءُ بدلی لل ءِ جیڈھ آنی ارزشت آناں من اتگ ءُ شرم الشیخ ءَ جوانیں منوگری بوتگ ایشانی نتیجگ ءَ لاس اینڈ ڈیمیج فنڈ ءِ برجائی ءَ جوڑ کنگ بوتگ پدا ھم منوگری آنی پد ءُ رندی ءِ ارزشت بیت۔ اے موہ ءِ سر ءَ مزن وزیر ءَ شرم الشیخ کانفرنس ءَ کامیاتیں سفارتکاری ءِپد ءَ سیادی داروکیں وزارت ءُ کارندہ آنی کوشست آنی توسیپ کت۔ ایشی ءَ چہ پیسر بنجاھی وزیر موسمی مٹ ءُ بدلی شیری رحمان ءَ گوشت کہ کوپ 27 ءَ کامیات سفارتکاری ءَ توامیں سٹیک لولڈرز ءِ شگر ءُ منت واری گراں۔ مزن وزیر ءِ سروکی ءُ رھشونی ءَ اے درستیں بوتگ انت۔ آئیءَگوشت کہ استیں ھور ءُ سیلاپ ءَ چہ پاکستان ءَ را سک باز تاوان رستگ، موسمی مٹ ءُ بدلی رند پد آنی آماچیں ملک نوک دیمروئی کنوکیں ملک آں گوں کمک لوٹ ائیت۔ آئی ءَگوشت کہ لاس اینڈ ڈیمیج فنڈ ءِ برجائی ءَ چہ پاکستان ءَ کلتی کرد پیلو کتگ۔ بنجاھی وزیر ءَ کلائمیٹ جسٹس ءِ مولءُ مراد ءِ واستہ یونائیٹڈ نیشن ءِ سیکرٹری جنرل ءِ کرد ھم لائک ءِ ستا انت۔ اے موہ ءِ سر ءَ وزیر ءِ مملکت درئی کار حنا ربانی کھر ءَ گوشتکہ کاپ 27 کانفرنس یک بے دروریں دیوان ءِ بوتگ ایش سی سال ءَ چہ مھتلی ءِ آماچیں لاس اینڈ ڈیمیج فنڈ ءِ برجائی بوتگ۔ آئی ءَ گوشتگ کہ اے فنڈ پاکستان وڑیں نوک دیمروئی کنوکیں ملک آنی واستہ کمکار سہرا بنت، فنڈ ءِ برجائی ءَ چہ میاں اوستمانی گوریچانی ءُ زر بار ءِ نیمگ ءَ تجاری وام آنی گر ءُ دار ءَ کمک رسیت۔ مراگش ءَ بنجاھی وزیر ، پارلیمنٹ ءِ باسک ، جتا جتائیں ملک آنی سفارتکار آنی بازیں مردم ءِ ساڑی ات۔ اے موہ ءَ ساڑیگیں مردم آناں وزارت ءِ موسمی مٹ ءُ بدلی ءِ نیمگ ءَ چہ پاکستان ءَ سیلاپ ءَ چہ بوھوکیں تباہی ، کمکی چست ءُ ایری، مزن وزیر ، سیکرتری جنرل یونائیٹڈ نیشن ءُ بنجاھی کابینہ ءِ سیلاپ ءَ چہ آماچیں دمگ آنی تر ءُ تاب ءَ چہ سیادی داروکیں ڈاکو منٹری پیش دارگ بوت۔
