اسلام آباد۔ 01 دسمبر (اے پی پی) صدر مملکت ڈاکٹر عارف علوی اسہ سوگو ءُ راج و جان جوڑ ملک اسے نا جوڑ کننگ کن غٹ شاری تے اسہ وڑ اٹ بیدس پرخ آن آب اٹ جان جوڑی نا خذمت فراوان کننگ نا عزم انا درشانی ءِ کرسا پارینے کہ پاکستان ایڈز انا زہمی تیکن ٹیسٹ و درمان نا خذمت آتا فراوانی کن تینا مخ تفی نا درشانی ءِ کیک۔ داخیال آتا درشانی ءِ او پنچ شنبےنادے آ ایڈز انا جہانی دے انا وخت آ تینا کلہو اٹی کرے۔ صدر مملکت پارے کہ نن قومی و صوبائی کہول آ ایچ آئی وی آ ردعمل ءِ پین سوگو کننگ کن ڈیٹا آ تالان ایسر نا مخ تفی ، جاچ و درمان اسکان رسینگ ءِ ودفنگ، راج انا نزور تپہ ءِ زرگزرانی وڑاٹ واکدار کننگ و ایچ آئی وی نا ناجوڑی و اونا زہمی تتون منسلک بدنامی و امتیازی سلوک نا چٹفنگ کن پبی گام گیج کینہ۔ اوپارے کہ نن یواین ایڈز، غیرسرکاری تنظیم، نجی بشخ و تینا شریدار آتون اواری اٹ ایچ آئی وی و ایڈزاتون مون تننگ نا پوسکن ءُ وڑ پٹنگ کن کوشست آتے برجاتخنہ، دااسہ قابل علاج ناجوڑی اسے ہرا نزور کمیونٹی تے زہمی کننگ ءِ۔ صدر مملکت پارے کہ نن ہمو مخلوق کن ہم دعا کینہ ہرافک ایڈز انا سوب آن تینا جون تیان دوتے سلانو و غمزدہ خاہوت آتا بندغ آتون تینا یکجہتی و مخ تفی نا درشانی ءِ کینہ ہرا دا مہلک ناجوڑی نا سوب آن تینا دوست آتے گوہانو۔ ڈاکٹر عارف علوی ایڈز انا جہانی دے انا وخت آ تینا مخ تفی نا درشانی ءِ کرسا پارے کہ ایڈز انا ہزمی تے دا باور کرفنہ کہ نن پوسکن آ انفیکشن ءِ توننگ نا مسخت تون غٹ تعلقدار اسٹیک ہولڈر آتون ہر کہول آ کاریم کرسا کینہ، ہرافک داٹی اختہ ءُ اوفتا درمان ءِ اوفتے بدنام کننگ آن بیدس احتیاط و جوزہ اٹ کینہ تانکہ ملک آن ایڈزانا صفایا ءِہمووڑ کننگے ہراوڑ بھاز انگا ایلو ملک آک سرسہبی اٹ کرینو۔ صدر مملکت غٹ تعلقدار فریق آتیا اسہ وار ولدا زور شاغا کہ او دا ناجوڑی ءِ پورو وڑاٹ شکست تننگ نا تینا عزم انا درشانی ءِ کیر تانکہ الس ٹ بیداری و نزور تپہ غاتے سلابت فراوان کننگے تانکہ دا ناجوڑی ءِ پورو وڑاٹ تورسا نہادی جان تے بچفنگ کن بنائی ریسہ غاتیٹی اونا تشخیص ءِ کننگ مرے۔
