اسلام آباد۔ 01 دسمبر (اے پی پی) بنجائی وزیر داخلہ رانا ثناء اللہ خان پارینے کہ آئین اٹی نوشتہ سو ب آتیان بیدس اسمبلی تے پرغنگ پارلیمان، جمہوریت و آئین نا توہین ءِ، پنجاب و کے پی کے نا حکومت آتے تحیل کننگ نا کوشست کننگا تو ہڑتوم آ صوبہ غاتیٹی گورنر راج یا تحریک بے پتی اس اتنگ کینہ، حکومت آتا تحلیل مننگ نا حالیت اٹ اِرا صوبہ غاتے ٹی دمدستی الیکشن یا الیکشن لس گچین کاری تسکان موخر کننگ تون اوار ایلو امور آ سجفنگ اُن، آئین و کانود نا رداٹ مون آ کانہ، اگہ عمران خان ءِ واقعی حکومت آن جتامروئی ءِ تو صدر مملکت نا عہدہ ، سینیٹ ، آزاد کشمیرو گلگت بلتستان نا حکومت آتیان ہم جتا مرے، ٹی ٹی پی تون ہچ ءُ باضابطہ مذاکرات اس متوکہ و نئے باضابطہ معاہدہ اس مسنے، ننا کنڈآن پیدوار ءِ کہ نن آئین آن بڑز ہچ ءُ ہیت اسے تسلیم کپنہ۔ او پنچ شنبےنادے آ پی آئی ڈی ٹی پریس کانفرنس آن تران کریکہ۔ وزیرداخلہ رانا ثناء اللہ خان پارے کہ کوئٹہ ٹی دہشت گردی نا واقعہ نا ترندی اٹ مذمت ءِ کینہ، ٹی ٹی پی نا کنڈآن دھماکہ نا زمواری ءِ قبول کننگ الارمنگ و قابل مذمت ءِ ، ٹی ٹی پی ءِ ننا ہمسایہ برادر ملک اوغانستان آن ہروڑنا آسراتی دوئی ءِ، اوفتے کن فکر انا لمحہ اس مرے کہ ٹی ٹی پی اگہ پاکستان نا تہہ ٹی دہشت گردی کیک تو دا ڈیہہ نا امن کن بھاز خطرناک ءِ۔ اوپارے کہ ملک انا داخلی وخارجی سیکورٹی نا بابت بڑزکو کہولی دیوان اسے ٹی اہم امور تیا سجفنگا، پاکستانی الس ءِ باور کرفنہ کہ دہشت گردآ تے دُوارہ کاٹم ہرفنگ کن الیپنہ۔ اوپارے کہ کے پی کے ٹی ہم دہشت گردی نا واقعہ مون آبننگ ءِ، دا تاثر تننگ انگ ءِ کہ دہشت گردی وس آن پیشن مسنے دُن ءُ ہچ ءُ ہیت اس اف ، بنجائی حکومت باندات آتے تینا دوٹی ہلنگ آن مست صوبائی حکومت آتا گچین کڑد انا گرج ءِ، داڑکن بنجائی حکومت ہروڑاٹ مچ آ پاکستان بشمول آزاد کشمیر، گلگت بلتستان تون کمکاری کن حاضر ءِ۔ اوپارے کہ بلوچستان و کے پی کے نا صوبائی انتظامیہ و کانود نافذ کروک آ ادارہ غاک داباندات آتے سنجیدگی اٹ ہلیر، ہراڑے بنجانا کمک درکار مرے تو ننا کنڈآن ہُرے مفک، صوبائی حکومت خاص وڑاٹ کے پی کے ءِ سنجیدہ مننگ نا گرج ءِ، امن و ایمنی نا حالیت آتیا وزیراعظم نا کماشی ٹی دیوان اس مس ولے وزیراعلیٰ خیبرپختونخوا ءِ تینا پارٹی نا کنڈآن دا دیوان تیٹی بشخ ہلنگ نا موکل ملتو اوکان پد ہم وزیراعلیٰ خیبرپختونخوا ءِ ہرا کمک بنجا آن درکار مرے او ہلنگ کیک۔ اوپارے کہ ملکی سیاست اٹ عمران خان نیازی و اونا جماعت و گنوک آتا ٹولی پاکستان نا سیاست اٹ ظہور پذیر مسنے، اوفتا کوشست ءِ کہ ملک اٹی ہڑدڑ و بے چیٹی تون اوار ہندن ءُ حالیت ودی کننگے ہرافتیان ملک نزوری نا گواچی مرے۔ اوپارے کہ اگہ ملک اسے ٹی سیاسی نزوری مریک تو ملکی زرگزران و امن و ایمنی ہم نزوری نا گواچی مریک۔ اوپارے کہ عمران خان ہراتم حکومت اٹ ئسک تو پاریکہ کہ اپوزیشن ءِ ہر قیمت آ صفاہستی آن چٹفوئی ءِ ، دااختیار اسہ انسان اسے ہم دوئی اف ولے دا بندغ داکاریم آ مسہ نیم سال خلک، کرپشن نا پن آ بیر ہلسا کرے و تینٹ ہندن ءُ کرپشن اس کرے ہرانا درور ملیپک، فرح گوگی نا کمک اٹ بھلو رشوت اس ہلسا تقرری و بدلی مرسا کرے۔ اوپارے کہ عمران خان نا پروپیگنڈا مشینری و ون پیج ہم اودے بچفنگ کتو، عمران خان نا نکتہ عروج دا ئسک کہ اسلام آباد آ چڑھائی کرے، کنا پن ءِ ہلسا پاریکہ کہ تیار مرک ڈکھنگ کن جاگہ اف، ای پاریٹ کہ اسلام آباد آ بر نشان ایتک۔ اوپارے کہ عمران خان نا راولپنڈی نا بارواٹی اونا خیال ئس کہ مچ آ پنڈی و چارمہ کنڈآن بندغ آک بریرہ، دنیانا میڈیا توار خلوئے کہ الس نا سمندر ا س بسنے۔
