اسلام آباد۔ 01 دسمبر (اے پی پی) بنجائی وزیر حوالکاری و شینکاری مریم اورنگزیب ودوک آ آبادی نا ویل انا مون ءِ توننگ کن صوبہ غاتیٹی جتا ءُ وزارت جوڑ کننگ نا سلاہ ترسا پارینے کہ اینخو سال دنیا نا آبادی 8 ارب و پاکستان نا 23 کروڑ مسنے، تدوک آ 75 سال اٹی پاکستان نا آبادی 3 کروڑ آن 23 کروڑ مس، 2030ء ٹی پاکستان نا آبادی 26 کروڑ 30 لکھ و 2050ء ٹی 33 کروڑ 80 لکھ مننگ نا گمان ءِ، آبادی نا رداٹ پاکستان دنیا نا پنچ میکو بھلا ملک جوڑ مسنے، ودوک آ آبادی نا مون ءِ توننگ کن زوت نیشنل ایمرجنسی پلان اس تننگک، وزیراعظم شہباز شریف بروک آ ہفتہ نیشنل ٹاسک فورس انا دیوان ءِ بٹنگانے، نیشنل ٹاسک فورس اٹی صوبہ غاتے نمائندگی تننگانے۔ داخیال آتا درشانی ءِ او پاپولیشن کونسل نا جوڑ مننگ نا 70 می سال دے انا دود آن تران کرسا کرے۔ بنجائی وزیر حوالکاری پارے کہ موسمیاتی بدلی تا بھسکاری آنبارودوک آ آبادی ہم خطرہ نا گھنٹی اسے ، آبادی ودک تو تعلیم ، جان جوڑی و خذمت عامہ کون آ ویل ہم ودی مریک۔ اوپارے کہ ہژدہ می ترمیم آن پد تعلیم، جان جوڑی و خذمت عامہ کون آ ویل صوبہ غاتا زمواری ءِ۔ اوپارے کہ پاکستان نا آبادی 2 درسد سالانہ نا رفتار اٹ ودنگ ءِ ، دا ویل آتون مون تننگ کن ودوک آ آبادی نا ویل اتون مون تروئی مریک۔ بنجائی وزیر حوالکاری قومی اہمیت نا دا ویل آتیا قومی بیانیہ اس ٹہیفنگ نا گرج آ زور شاغسا پارے کہ بیانیہ نا ٹہیفنگ اٹ غٹ اسٹیک ہولڈر آتے اوار کننگے۔ اوپارے کہ حکومتی کہول آ داوڑنا ویل آتیا است انا حب اٹ شرہ کننگے۔ داڑکن غٹ ءِ تینا کڑد ءِ ادا کروئی مریک۔ مریم اورنگزیب پارے کہ نوکاپ کون آ قدرتی آفت اٹی قوم ساڑی ہی ٹی بھلو بھسکاری اسے تون مون تس، بھسکار نوکاپ نا سوب آن پاکستان اٹی چناوزالبول آک بھاز زہمی مسر، مستین اٹ پارلیمنٹ اٹ اڈ ہلوک آ قومی کانفرنس نا منظور کروک اعلامیہ ٹی ہدف آتا پیدوار تعین مسوسس، کانفرنس نا اعلامیہ غا صوبہ غاتا دستخط ہم ارے، دا ہدف و سلاہ کروک گام گیج آتا بحالی نا گرج ءِ۔ اوپارے کہ ہنداوڑ نن پالیسی سازی، کانود سازی و بیانیہ نا ٹہیفنگ تون اوار اوار درکار ہدف آتے دوئی کننگ کینہ۔ اوپارے کہ مستین اٹی محکمہ ڈٹ بندی الس ءِ دا ویل آتیان معلومدار کننگ اٹ اہم ءُ کڑد اس ادا کرے۔ بنجائی وزیر حوالکاری ودوک آ آبادی نا بابت ڈیجیٹل میڈیا غا آگاہی ودی کننگ و بیانیہ نا تشکیل اٹ پاپولیشن کونسل ءِ ہرممکن کمکاری نا باوری کرفے۔
