لاہور۔ 01 دسمبر (اے پی پی) بنجائی وزیر ڈٹ بندی پروفیسر احسن اقبال پارینے کہ تعمیری راج اکن تعلیم المی ءِ ، یونیورسٹیک ساڑی آدور ءِ ہرسا نصابی سرجزآتے مون آ دیر، دنیا ٹی مون آ ہِننگ کن تکنیکی تعلیم المی ءِ۔ داخیال آتا درشانی ءِ او پنچ شنبےنادے آ داڑے یونیورسٹی آف مینجمنٹ اینڈ ٹیکنالوجی (یو ایم ٹی ) ٹی اڈ ہلوک ’’سول اینڈ کنسٹرکشن انجینئرنگ اٹ جدت لان‘‘ نا سرحال آ جہانی کانفرنس آن تران کرسا کرے۔ داوخت آ صدر یو ایم ٹی ابراہیم حسن مراد، ریکٹریو ایم ٹی ڈاکٹر آصف رضا، ڈی جی یو ایم ٹی پروفیسر عابد شیروانی، پروفیسر ڈاکٹر مجاہد کامران، ڈین اسکول آف انجینئرنگ ڈاکٹر عثمان رشید تون اوار ایلو فیکلٹی ، قومی و جہانی اسکالر، ریسرچر، سول انجینئر، طالب علم آک بشخ ہلکر و سول انجینئرنگ نا بابت 50 آن زیات پٹ وپولی مقالہ جات ہم پیش کریر۔ بنجائی وزیر احسن اقبال پارے کہ سی پیک پاکستان کن اسہ گیم چینجر ڈٹ اسے، تدوک آ سال تیٹی جہانی کہول آ کنسٹرکشن انڈسٹری ٹی ٹیکنالوجی و انوویشن بھاز بھلو اثر اس اِلا و بدلی ایسونے، سیاسی نزوری ننا داڑے اسہ ویل اسے و پالیسی تا چرجوئی سلتنے۔ اوپارے کہ ایلو ملک آک ننے آن مون آ ہنار۔ بنگلہ دیش، انڈونیشیا، ملائیشیا اونا درور آک ءُ، قوم و ورناتیان خواست ءِ کہ اختلاف رائے ضرور تخر ولے خار کپس۔ احسن اقبال پارے کہ اختلاف رائے ءِ نن خار اٹ بدل کرینن، راج ءِ پولرائزڈ کرینن وخت اس کہ اودے سوگوی نا گرج ءِ۔ اوپارے کہ راج ءِ ڈی پولرائزڈ کروئی مریک، داڑے سوگوی، سگ، صبر و شونداری نا سبخ ءِ مون آ دروئی مریک، ننے دا سجفوئی مریک کہ خار اٹ راج چلینگ کپک، ننے سخت گرج ءِ کہ اسہ ایلو آ تنقید اٹی احترام نا دامن ءِ الیپن۔ بنجائی وزیر پارے کہ زرگزرانی ماہر، پوریاگر و صنعت کار آتے پوسکن آ ٹیکنالوجی نا کنڈا بریر انتئے کہ پوسکن آ ٹیکنالوجی نا کاریم اٹ اتنگ آن بیدس ملکی شونداری ممکن اف ، اخس زیات ملک اٹی پیشن نا زرکاری بریک زرگزران ہموخہ زیات شون ہلیک، ڈالر بریک تو ملک چلینگک۔ اومستی پارے کہ ننے ورناچین ءِ گچین آخبت اس تننگ نا کنڈا ہنوئی مریک۔
