اسلام آباد۔ 01 دسمبر (اے پی پی) منشیات تور فورس (اے این ایف ) نا منشیات نا برخلاف چندی کارروائی تیٹی چندی وڑنا منشیات دوئی کرے۔ ترجمان اے این ایف نا کنڈآن پنچ شنبےنادے آ جاری بیان نا رداٹ منشیات تور فورس (اے این ایف) گوادر اٹی خطرناک و بیابان مشی آ علاقہ ٹی اودیم حوال آ سرسہب کارروائی کرسا اُوچ آتا کمک اٹ بھلو کچ اسے ٹی چرس اسمگل کننگ نا کوشست ءِ بے سہب کرے۔ دا کارروائی ٹی 1400 کلو چرس ہلنگا ہرافتے اُوچ آتا باریم کرسا گوادر و ولدا سمندری کسر اٹ اسمگل کروئی ئسک۔ اے این ایف نا انٹرنیشنل میل آفس راولپنڈی ٹی لندن آن بروک آ پارسل آن 68 گرام ویڈدوئی کرے۔ اسہ پین کارروائی اسے ٹی باچہ خان انٹرنیشنل بالی پٹ پشاور آ شارجہ غا ہنوک آ 2 دوبہ دار آتا ٹرالی بیگ آن 3 کلو 500 گرام آئس دوئی کرے۔ نیشنل ہائی وے روڈ حیدر آباد نا خڑک ٹرک آن 119 کلو چرس دوئی کرسا 2 دوبہ دار ءِ دزگیرکرے۔ کراچی انٹرنیشنل بالی پٹ آ بنکاک آ ہنوک آ 2 دوبہ دار و زالبول اسے نا پڈ آن جم وڑاٹ 150 ہیرون آن پُر کیپسول دوئی کرے۔ نیشنل ہائی وے آ سکھر نا خڑک مہراب پور نا ہنکینی دوبہ دار اسے آن 11 کلو چرس دوئی کرے۔ دوبہ دار آتا برخلاف منشیات تور ایکٹ نا رداٹ مقدمہ درج کننگانے۔
