اسلام آباد۔ 30 نومبر (اے پی پی) وزیراعظم محمد شہباز شریف بلوچستان اٹی کوئٹہ نا نواحی علاقہ بلیلی ٹی پولیو ٹیم انا رکھنگ کن سلوک پولیس نا گاڈی آ دھماکہ نا ترندی اٹ مذمت ءِ کرسا واقعہ نا دمدستی جاست وپاست نا پارت کرینے۔ چار شنبےنادے آ وزیراعظم آفس نا میڈیا ونگ آن جاری بیان نا رداٹ وزیراعظم ٹھپی مروک آتے گچین طبی آسراتی فراوان کننگ نا ہم پارت کرے۔ اوواقعہ ٹی پولیس کارندہ غاتون اوار اسہ چناسے نا شہیدی آ ڈکھیائی نا درشانی ءِ کرسا پارے کہ پولیو کارندہ غاک ملک آن دا مرض انا چٹفنگ کن تینا جون ءِ دلدستہ تخسا دا فرض ءِ سرتننگ ءُ، ہراڑا ای اوفتے خراج تحسین پیش کیوہ۔ اوپارے کہ شرپسند زموار آک ملک آن پولیو نا چٹفنگ نا دا مہم ءِ توننگ اٹ مدام بے سہب مریرہ و پاکستانی قوم، کانود نافذ کروک آ ادارہ غاک و پولیو کارندہ غاک شرپسند زموار آتا داناپاک کوشست آتے اسُل سرسہب مننگ کن الیپسہ۔ وزیراعظم پارے کہ ملک آن پولیو نا پورو چٹفنگ حکومت نا اولیت آتیٹی اوار ءِ۔ حکومت ملک آن پولیو نا چٹفنگ اسکان آسرات تولپک۔ کنتون اوار مچ آ قوم انا غٹ تر ہمدردیک شہید آتا خاہوت آتون ءُ۔ وزیراعظم واقعہ ٹی ٹھپی مروک آتا زوت دراخ جوڑی کن دعا کرے۔
