اسلام آباد۔ 30 نومبر (اے پی پی) صدر مملکت ڈاکٹر عارف علوی کوئٹہ نا نواحی علاقہ بلیلی ٹی پولیو مہم اٹی ڈیوٹی آ ساڑی گاڈی آ دہشت گرد آتا جلہو نا مذمت ءِ کرسا پارینے کہ راج دشمن زموار آتے پولیو نا پورو چٹفنگ نا مشن اٹی اڑاند شاغنگ کن الیپنہ۔ چارشنبےنادے آ ایوان صدر نا پریس ونگ آن جاری بیان نا رداٹ صدر مملکت دھماکہ ٹی چنا و پولیس کارندہ غاتا زوال مننگ آ است ہسونی نا درشانی ءِ کرینے۔ صدر مملکت پارے کہ چناک ننا نہادی قومی میرات و آخبت آک ءُ۔ پاکستان نا چناتے پولیو کون آ ناجوڑی آن رکھ تخنگ کن سنبرینگوک اُن۔ صدر مملکت ملک آن پولیو نا پورو چٹفنگ اسکان کوشست آتے برجا تخنگ نا عزم انا درشانی ءِ کرینے۔ صدر مملکت پارے کہ راج دشمن زموار تے پولیو نا پورو چٹفنگ نا مشن اٹی اڑاند شاغنگ کن الیپنہ۔ اوپولیو نا چٹفنگ کن ہیلتھ ورکرزو پولیس نا کوشست آتے خراج تحسین پیش کرے۔ اوٹھپی مروک آتیکن زوت دراخ جوڑی کن دعا، زوال کروک آتیکن بخشش نا دعا کرے۔
