کوئٹہ۔ 30 نومبر (اے پی پی) کوئٹہ نا علاقہ بلیلی ٹی پولیس کارندہ غاتا ٹرک انا خڑک آ دھماکہ ٹی اِرا بندغ زوال وخت اس کہ 24 بندغ ٹھپی مسنو، پولیس کمامدارآتا رداٹ بمب دھماکہ چارشنبے نا سہب اتون کوئٹہ نا نواحی علاقہ بلیلی ٹی مس۔ ٹرک اٹی بلوچستان کانسٹیبلری نا کارندہ غاک سوار ئسر ہرا پولیو تور ٹیم انا ڈیوٹی کن ہنارہ۔ ڈی آئی پولیس کوئٹہ اظفر مہیسر صحافی تتون گپ وتران کرسا پارے کہ دھماکہ ٹی 20 انا خڑک پولیس کارندہ و چار شاری ٹھپی مسنو۔ اوپارے کہ دھماکہ خودکش ئسک ہراٹی 25 کلوگرام بارودی مواد آتا استعمال مس۔ اومستی پارے کہ پولیس کارندہ غاک پولیو تور ٹیم انا سیکورٹی کن ہنارہ۔ ڈی آئی جی اظفر مہیسر نا پاننگ ئسک کہ دھماکہ ٹی 2 بندغ زوال کرینو ہرافتے ٹی اسہ پولیس کارندہ و اسہ کَسری اس اوار ءِ۔ لاش و ٹھپی تے سول ہسپتال آ سرکننگانے۔ سول ہسپتا ل نا ترجمان ڈاکٹر وسیم بیگ اِرا مرک ءِ پک کرسا پارے کہ 24 ٹھپی تے سول ہسپتال آ اتنگا ہرافتے ٹی پولیس کارندہ و سویلین ہم اوار ءُ۔ ڈی آئی جی پولیس کوئٹہ نا رداٹ ٹرک اٹی سُوار کارندہ غاک پولیو ڈیوٹی کن ہنارہ، وخت اس کہ پولیو ٹیم اناگاڈی ءِ داسکان داکان گدرینگوئی ئسک، دھماکہ غان پد ٹرک اٹی خاخر لگا، کارندہ غاتیان بیدس ایلو ٹھپی مروک آتیٹی شاریک اوار ءُ۔ پولیس نا دھماکہ نا مون اٹی برسا خڑک آن گدرینگوک آ گاڈی ٹی ساڑی زالبول اس ہم ٹھپی مس وخت اس کہ دامون ایمون نا ایلو گاڈی تے ہم نسخان رسینگا، دھماکہ غان دمدستی پد کوئٹہ نا ہسپتال آتیٹی ایمرجنسی نافذ کرسا طبی عملہ ءِ الرٹ کننگانے۔
