اسلام آباد۔ 30 نومبر (اے پی پی) اسپیکر قومی اسمبلی راجہ پرویز اشرف پارینے کہ پاکستان پیپلزپارٹی ملک اٹی السی خذمت و جمہوریت نا مون آ دننگ نا بے مٹ ءُ داستان اسے۔ چارشنبےنادے آ پاکستان پیپلزپارٹی نا 55 می یوم تاسیس نا وخت آ او تینا کلہو اٹی پارے کہ ملک اٹی جمہوریت نا مون آ دننگ کن پاکستان پیپلزپارٹی بے مٹ قربانی تسنے، پاکستان پیپلزپارٹی مدام الس نا است خواہی تا ترجمان ءِ کرینے و السی خذمت ءِ مدام مقدم تخانے، قائد الس شہید ذوالفقار علی بھٹو پاکستان پیپلزپارٹی نا بنداو ءِ تخاسس۔ اوپارے کہ قائد الس ہمو عظیم راہشون ئس ہرا سقوط ڈھاکہ غان پد ملک ءِ دُوارہ تینا نت تیا سلفنگ کن اہم ءُ کڑد ادا کرے، پاکستان پیپلزپارٹی شہید ذوالفقار علی بھٹو نا کماشی ٹی پاکستان ءِ 1973ء نا آئین نا حالیت اٹ پورو دستور فراوان کرے، پیپلزپارٹی 18 آئینی ترمیم نا کمک اٹ آئین نا اصل روح انا رداٹ بحال کرے و صوبہ غاتے واکداری تس۔ پاکستان پیپلزپارٹی ملک ءِ ایٹمی قوت اس جوڑ کننگ نا بنداو ءِ تخا۔ پاکستان پیپلزپارٹی تینا ہرمسٹ آ دور تیٹی بے مٹ حکومت کرے۔ قائد الس شہید ذوالفقار علی بھٹو نا شہیدی آن پد گودی نصرت بھٹو و گودی بینظیر بھٹو شہید نا کماشی ٹی تینا جہد ءِ برجاتخا، گودی بینظیر بھٹو شہید نا پاکستان اٹی جمہوریت نا بحالی کن تروک آ قربانی تے مدام روشنا لوز آتیٹی نوشتہ کننگک۔ اسپیکر قومی اسمبلی پارے کہ پاکستان پیپلزپارٹی نا چیئرمین بلاول بھٹو زرداری و شریک چیئرمین آصف علی زرداری نا کماشی ٹی ملک اٹی جمہوریت نا سوگوی و آئین و کانود نا حکمرانی و السی راجی آسراتی کن پبی کڑد ادا کننگ ءِ، ملک اٹی جمہوریت و جمہوری قدر انا مون آ دننگ کن شہید ذوالفقار علی بھٹو و شہید گودی بینظیر بھٹو نا مشن ءِ ہر قیمت آ برجاتخنگک۔ جمہوریت نا بحالی کن پیپلزپارٹی نا شہید آتے خراج عقیدت پیش کیوہ۔ پاکستان پیپلزپارٹی تینا شہید آتا قربانی اسُل است آن دپک۔
