اسلام آباد ۔ 30 نومبر (اے پی پی) پاکستان اٹی امریکہ نا سفیر ڈونلڈ بلوم چارشنبے نادے آ بڑزکو تعلیم و افرادی قوت نا شونداری نا بابت جہانمی کانفرنس نا بناءِ کرینے۔ داوخت آ یوٹایونیورسٹی نا عہدیدار و بنجائی وزیر شونداری ڈٹ بندی و خصوصی گام گیج احسن اقبال ئسک ہم اوڑتون اوار ئسر۔ داکانفرنس نا سرحال ’’اکیسویں صدی ٹی بڑزکو تعلیم نا کڑد‘‘ ءِ وخت اس کہ تعلیم وملازمت نا نیام اٹ بدل مروک حالیت آتے تالان کرسا کانفرنس دا ٹک آ شرہ کیک کہ جامعہ غاک ہراوڑ دا تغیر پذیر حالیت آتون مون تننگ کن اول سرآن صف بندی کننگ کیرہ۔ دا کانفرنس ءِ ہائر ایجوکیشن سسٹم اسٹرینتھننگ ایکٹیو یٹی (ایچ ای ایس ایس اے) نا رداٹ کننگ انگ ءِ وخت اس کہ داڑکن کمک امریکی ادارہ جہانی شونداری (یو ایس ایڈ) نا کمک اٹ فراوان کننگ انگ ءِ۔ پاکستان نا 16 سرکاری جامعہ و ایلو شریدار آک داٹی اوار ءُ ہرانا مسخت جامعہ غاتیٹی داوڑنا سرحال آتیا تدریس و پٹ وپول ءِ مون آ دننگ ءِ ہرانا عملی میدان اٹ گرج مرے و یونیورسٹی تیان فارغ مروک آ بندغ آتے ملازمت دوبننگ کے۔ کانفرنس آن تران کرسا سفیر ڈونلڈ بلوم ریاست ہائے متحدہ امریکہ و پاکستان نا نیام اٹ 75 سال آن جوڑ دیرینہ شریداری نا ستاءِ کرے و پارے کہ اسہ ہندن ءُ ملک اسے ٹی ہرانا آبادی نا 60 درسد آن زیات حص 30 سال آن کم وئی نا ورناتیا تالان مرے، امریکہ ءِ مرے کہ او ورناتا کمک ءِ برجاتخے تانکہ او تینا قابلیت ءِ پبی وڑاٹ کاریم اٹ اتنگ کیر۔ ہائر ایجوکیشن کمیشن (ایچ ای سی ) پاکستان نا چیئرمین ڈاکٹر مختار احمد دا عزم انا درشانی ءِ کرے کہ ایچ ای سی گریجویٹ بندغ آتا ملازمت آتیٹی اوار مننگ نا کچ اٹی گچینی کن چاہندار آتا کھیپ اس تیار کننگ آ امریکی حکومت تون کاریم کرسا کیک۔ امریکہ غان یوٹاریاست نا سینیٹر کیتھ گروور پارے کہ ہر تعلیمی ادارہ نا گڈیکو مسخت ورناتے ہمو اہم آ مہارت آتیان ہمکنار کننگ مریک ہرافتے کاریم اٹ اتسا او ہندی و جہانی کہول آ افرادی قوت اٹ مثبت کڑد ادا کننگ کیر۔
