اسلام آباد۔ 29 نومبر (اے پی پی) صدر مملکت ڈاکٹر عارف علوی فلسطینی الس کن پاکستان نا پدریسہ و دوٹوک مخ تفی نا درشانی ءِ کرسا پارینے کہ فلسطینی تا آجوئی نا جہد ہمووخت اسکان برجاسلک ہراتم اسکان اوفتے حق خودارادیت نا کاریم اٹ اتنگ نا موقع تفننگک و پاکستان اوفتے تون جہد اٹی سلک۔ سے شنبےنادے آ ایوان صدر نا پریس ونگ انا رداٹ صدر مملکت داخیال آتا درشانی ءِ فلسطینی الس تون یکجہتی نا جہانی دے انا وخت آ تینا کلہو اٹی کرے۔ اوپارے کہ پاکستان تاریخی وڑاٹ فلسطینی تا روا جہد نا مخ تفی ءِ کرسا بسنے و کرسا کیک، پاکستان جہانی کہول آ امنا مروک شڑت و امن معاہدہ کن مذاکرات آ فلسطینی رضامندی نا مخ تفی ءِ کیک۔ صدر مملکت پارے کہ اینو جہانی برادری تون فلسطینی الس تون یکجہتی نا دے ءِ اڈتننگ انگ ءِ ، ہفت ءُ نیم دہائی ٹی اسرائیل فلسطینی تتون منظم و ودوک آ زیادتی تے رواتخا، بے گناہ تا خون ءِ وہیفنگاو فلسیطنی تا دتر ءِ وہیفنگ نا چرجوئی داسکان سلتنے۔ صدر مملکت پارے کہ پدریسہ اسرائیلی بیدادی نا تازہ آ واقعہ داسال اگست اٹ مون آ بس ہراتم غزہ ٹی اسرائیلی بمباری ٹی 17 چناتتون اوار کم و ود 50 فلسطینی زوال و 300 آن زیات ٹھپی مسر۔ ڈاکٹر عارف علوی پارے کہ فلسطینی تا برخلاف سلپروک آ اسرائیلی بیدادی، اسرائیل نا فلسطین آ ناروا کوزہ داجھیڑہ نا ناقابل تردید حقیقت آک ءُ، اسرائیل نا کنڈآن مقبوضہ فلسطینی علاقہ غاتے ضم کننگ، الحاق و کوزہ انسانی و جہانی کانود آتیان چپ ءِ۔ صدر مملکت پارے کہ ای فلسطینی تیکن پاکستان نا بدل مفروک مخ تفی نا درشانی ءِ کیوہ، واک انا زور آ علاقہ غا کوزہ کننگ مریک ولے الس نا است و دماغ آ کوزہ کننگ مفک،فلسطینی تا آجوئی نا جہد حق خودارادیت نا دوئی مننگ اسکان برجاسلک۔ اوپارے کہ پاکستان فلسطینی تا موقف نا مخ تفی ءِ کیک و جہانی کہول آ امنا مروک شڑت و 1967 آن مہالو نا سیم تا بنداو آ جہانی چاروکی ٹی فریق آتا نیام اٹ اسہ مقررہ ٹائم فریم اسے ٹی جھیڑہ نا ایسری خواہک و دا کہ او دے ٹکی بیت المقدس نا فلسطینی ریاست نا دارالحکومت نا وڑاٹ پورو مخ تفی ءِ کیک۔ صدر مملکت پارے کہ پاکستان تاریخی وڑاٹ فلسطینی تا روا جہد نا مخ تفی ءِ کرینے و او آخبت ہم اونا مخ تفی ءِ کرسا کیک۔
