اسلام آباد۔ 29 نومبر (اے پی پی) بنجائی وزیر مواصلات و پوسٹل سروسز مولانا اسعد محمود موٹروے پولیس نا سلور جوبلی آ موٹروے پولیس ءِ مبارکبادی ترسا پارینے کہ موٹروے پولیس نا ادارہ ءِ پوسکن آ وڑوڈول آتیان استوار کینہ، موٹروے پولیس نا کسبی لائخی تیان قومی شاہراہ تیا ٹریفک شکست آتیٹی نمان کمتی واقع مسنے۔ داخیال آتا درشانی ءِ او سے شنبےنادے آ 25 سال پورو مننگ آ نیشنل ہائی ویز اینڈ موٹروے پولیس نا سلور جوبلی دود آن تران کرسا کرے۔ داوخت آ آئی جی موٹروے پولیس خالد محمود و موٹروے پولیس نا بڑزکو کمامدارآتون اوار ایلو آفیسر و کارندہ غاک ہم ساڑی ئسر۔ بنجائی وزیر مواصلات اسعد محمود دود اٹی بطور مہمان خاص بشخ ہلک۔ دود آن تران کرسا مولانا اسعد محمود پارے کہ نیشنل ہائی ویز اینڈ موٹروے پولیس نا کارکڑد آ نن بحیثیت قوم گمر کننگ کینہ، موٹروے پولیس نا کسبی لائخی تیان قومی شاہراہ تیا ٹریفک نا شکست آتیٹی نمان کمتی مسنے۔ اوپارے کہ آفیسر آتا سخت خواری، دیانتداری و جوان اخلاق نا سوب آن موٹروے پولیس اسہ بے مٹ ءُ ادارہ اسے نا وڑاٹ مون آ بسنے، موٹروے پولیس مسافرآتے گچین سفری آسراتی فراوان کننگ و ہروڑنا پرخ و تعصب آن ایڑتر کانود نا اسہ وڑ نفاذ اٹ لگوک ءِ۔ بنجائی وزیر پارے کہ ای گمر کیوہ کہ ای اسہ ہندن ءُ ادارہ سے نا وزیر اُٹ کہ ہرانا موازنہ ءِ جہانی پولیس ادارہ اسے تون کننگ مریک، آئی جی خالد محمود کمانڈ ءِ سنبھالنگ تون ساڑی آ دور انا خواست آتیا پورو سلنگ کن ہراگام گیج آتے کرینے او سفت نا قابل ءُ۔ موٹروے پولیس نا تنخواہ تیٹی ودکی نا بابت پبی کڑد ادا کیوہ۔ بنجائی وزیر پارے کہ ہندن ءُ گام گیج ہرا شاری تیکن المی ءُ اوفتے اولیتی بنداو تیا کننگ اُن، ادارہ ٹی ملازم آتا ترقی نا ویل ئسک اودے ہم ایسر کرین ہندا وڑ این ایچ اے و موٹروے پولیس اٹی ہم قاعدہ و ضابطہ نا رداٹ ملازم آتے اوفتا ملازمت آتیا آخبتی کننگا۔ اوپارے کہ پاکستان پوسٹل سروسز ءِ ہم کٹیائی ءُ ادارہ اس جوڑ کینہ، نن دا بابت پبی گام گیج کرسا 600 ڈاکخانہ غاتے بحال کرینن تانکہ پوسٹل سروسز ءِ پین کٹیائی ءُ ادارہ اس جوڑ کننگ مرے۔ این ایچ اے و موٹروے پولیس و پوسٹل سروسز اٹی صارف آتے جہانی آب انا سروسز فراوان کننگ اُن۔ داوخت آ تینا تران اٹی آئی جی موٹروے پولیس خالد محمود تینا فورس ءِ مبارکباد ترسا پارے کہ موٹروے پولیس ءِ آئی لینڈ آف ایکسیلنس و کرپشن فری ادارہ نا پن تننگانے، ایمانداری موٹروے پولیس نا ایمان، خوش اخلاقی اونا پہچان و مسافر آتا کمک اونا شان ءِ۔ اوپارے کہ نیشنل ہائی ویز اینڈ موٹروے پولیس تینا کسبی لائخی تیان ملک اٹی اسہ پوسکن ءُ پولیس کلچر اسے درستی راستی کرفیر، موٹروے پولیس نا گچین حکمت عملی آن شکست و شاہراہ تیا ڈوہ تیٹی نمان کمتی بسنے، یوم تاسیس نا وخت آ نن تینا ہمو شہید آتا عظیم قربانی تے اسُل است آن دننگ کپنہ۔ آئی جی پارے کہ نیشنل ہائی ویز اینڈ موٹروے پولیس پوسکن آ ٹیکنالوجی نا کاریم اٹ اتنگ اٹ کس اسے آن پدی نئے، پوسکن آ کمانڈ اینڈ کنٹرول سینٹرنا جوڑ کننگ ہندا چرجوئی نا اسہ کڑی اسے۔
