اسلام آباد۔ 29 نومبر (اے پی پی) نیشنل الیکٹرک پاور ریگولیٹری اتھارٹی (نیپرا) نا چیئرمین توصیف ایچ فاروقی پارینے کہ سی پیک نا رداٹ توانائی نا ڈٹ آتیان پاکستان اٹی بجلی نا صنعت گچین مسنے، سی پیک توانائی نا ڈٹ آک تدوک آ 5 سال اٹی فرنس آئل و ڈیزل آن کولا و قابل تجدید توانائی نا وسیلہ غاتسکان کبین توانائی نا پیدوار نا جاگہ ءِ ہلکنو، پاکستان نا توانائی نا گرج آتے کم نہاد آ پورو کننگانے ہراڑان برآمد آتیٹی ودکی مسنے۔ اسہ انٹرویو اسے ٹی اوپارے کہ سی پیک نا توانائی نا ڈٹ بشمول کولا، تہو ، شمسی و پن بجلی نا ڈٹ آتا کل نصب لائخی 6570 میگاواٹ ءِ۔ اومالی سال 2020-21و 2021-22اٹی بالترتیب 28549.94و 25772.48کلوواٹ فی گھنٹہ بجلی ودی کننگا ہرا ملک انا کل پیدوار نا 22.03و 18.37 درسد ءُ۔ قومی گریڈ اٹی اوسطا 20 درسد سالانہ ودکی ملک انا تہہ ٹی لوڈشیڈنگ نا ودوک آ ویل آتے کم کرے خاص وڑاٹ پاکستان اٹ برآمد آتیا تالان صنعت آتے سوگوی ملا۔ اونا پاننگ ئسک کہ سی پیک توانائی نا ڈٹ آک تدوک آ 5 سال آتیٹی فرنس آئل و ڈیزل آن کولا و قابل تجدید توانائی نا وسیلہ غاتسکان کبین توانائی نا پیدوار نا جاگہ ءِ ہلکنو، پاکستان نا توانائی نا گرج آتے کم نہاد آتیا پورو کننگانے ہراڑان برآمد آتیا تالان صنعت آتیٹی شونداری مسنے۔ اوپارے کہ جہانی منڈی ٹی ایندھن نا نہاد آتیٹی ودکی نا سوب آن تدوک آ سال آن خڑچ ودنگ ءِ، اوکان پد ہم سی پیک ڈٹ داسہ ہم مسابقتی کچ فراوان کیک۔ اونا پاننگ ئس کہ اینخو سال اکتوبر اٹی درآمدی کولا آ تالان سی پیک ڈٹ آتا بجلی نا پیدواری خڑچ 18.5 روپئی ئسک و فرنس آئل و آر ایل این جی آ تالان اُرائی ڈٹ آتا خڑچ بالترتیب 34.0 و 31.0 روپئی ئسک۔ چیئرمین نیپرا پارے کہ کولا آ تالان سی پیک پروجیکٹس(ای پی پی ) اوسطا 22.13 روپئی فی کلو واٹ فی گھنٹہ و تیل آ تالان غیر سی پی ای سی ڈٹ آتا نہاد 36.61روپئی فی کلو واٹ ءِ، داڑان پاش مریک کہ سی پیک توانائی نا ڈٹ آک بڑزکو کارکڑد اتون ایندھن ءِ کاریم اٹ اتسا لکھ آ پاکستانی اُراتے اڑزان بجلی فراوان کننگ اٹی ءُ۔
