چین و پاکستان نا نیام اٹ سائنس و ٹیکنالوجی نا بشخ اٹی ہڑتوم آ کنڈآتا کمکاری ءِ مون آ دننگ کن ایس اینڈ ٹی سینٹر اس جوڑ

بیجنگ۔ 29 نومبر (اے پی پی) چین وپاکستان نا نیام اٹ سائنس و ٹیکنالوجی نا بشخ اٹی ہڑتوم آ کنڈآتا کمکاری ءِ مون آ دننگ کن اسہ مزل نا نشان اسے نا وڑاٹ چائنہ ٹی ایس اینڈ ٹی سینٹر اس جوڑ کننگانے۔ دا چرجوئی ٹی بیجنگ اٹی اسہ ویبینار اس اڈ ہلک ہراٹی پاکستان نا اسپیشل ٹیکنالوجی زونز اتھارٹی (ایس ٹی زیڈ اے) و چین نا ژونگ گوانکون بیلٹ اینڈ روڈ انڈسٹریل پروموشن ایسوسی ایشن (زیڈ بی آر اے) داسینٹر نا بناءِ کریر۔ ویبینار اٹی چین اٹی پاکستان نا سفیر معین الحق تران کرسا پارے کہ وزیراعظم محمد شہباز شریف نا ساڑی آ دورہ چین اٹی انفارمیشن ٹیکنالوجی چائنہ پاک کمکاری نا اسہ اہم ءُ بشخ اسے نا وڑاٹ مون آ بسنے ہرانا شاہدی سی پیک نا رداٹ اسیجائی ورکنگ گروپ ایس اینڈ ٹی نا جوڑ کننگ ءِ۔ اوپارے کہ ایس اینڈ ٹی سینٹر ہڑتوم آ کنڈآتا کمکاری ءِ ودفنگ نا کنڈا اسہ اہم ءُ پیش رفت اس مریک۔ داوخت آ چین نا ژونگ گوانکون بیلٹ اینڈ روڈ انڈسٹریل پروموشن ایسوسی ایشن (زیڈ بی آر اے) نا صدر ژانگ ژیاؤڈونگ پارے کہ نن دا سینٹر ءِ اسہ پلیٹ فارم اسے نا وڑاٹ چین و پاکستان نا غٹ جماعت آتے متحرک کننگ خاص وڑاٹ ہائی اٹیک انٹرپرائزز و ادارہ غاتے سائنس و ٹیکنالوجی نا کمکاری کن وسیلہ تیار کننگ و یکجا کننگ کن کاریم اٹ اتینہ۔ اوپارے کہ ایس اینڈ ٹی انٹرپرائزز نا اسہ چینی ڈل اس فیلڈ انویسٹی گیشن کن بروک آ سال پاکستان نا دورہ ءِ کیک۔