پاکستان اٹی کرکٹ نا جنون ءِ، مچ آ دنیا چاہک کہ پاکستانی الس نا کرکٹ تون بھاز لگک، مریم اورنگزیب

اسلام آباد۔ 29 نومبر (اے پی پی) بنجائی وزیر حوالکاری و شینکاری مریم اورنگزیب انگلینڈ کرکٹ ٹیم انا پاکستان آ بننگ نا ستاءِ کرسا پارینے کہ پاکستان اٹی کرکٹ نا جنون ءِ، مچ آ دنیا چاہک کہ پاکستانی الس ہراوڑکرکٹ تون مہرومریبت تخک۔ داہیت ءِ او برطانوی ہائی کمشنر کرسچن ٹرنر نا کنڈآن تدوک آ دے پاکستان و انگلینڈ نا کرکٹ ٹیم تا اعزاز اٹ تروک آ سوارہ نا وخت آ گپ وتران کرسا پارے۔ سوارہ ٹی انگلینڈ کرکٹ ٹیم نا کیپٹن بین اسٹوکس و پاکستان کرکٹ ٹیم نا کیپٹن بابراعظم بنجائی وزیر حوالکاری تون اوڑدہی کریر۔ داوخت آ گپ وتران کرسا مریم اورنگزیب پارے کہ پاکستان و انگلینڈ نا نیام اٹ 17 سال آن پد تاریخی ٹیسٹ سیریز کن مچ آ قوم پرجوش ءِ۔ اوپارے کہ پاکستان انٹرنیشنل کرکٹ کن گچین و رکھوک ءُ جاگہ اسے، حکومت پاکستان انگلینڈ کرکٹ ٹیم ءِ گچین سیکورٹی فراوان کننگ ءِ۔ بنجائی وزیر حوالکاری ساڑی آ ٹی ٹونٹی ورلڈ کپ اٹی پاکستان و انگلینڈ کرکٹ ٹیم تا کارکڑد نا ستاءِ کرے۔ داوخت آ برطانیہ نا کرکٹ ٹیم انا کیپٹن بین اسٹوکس گچین مہمانداری آ پاکستان نا الس نا منت واری ءِ ہرفسا پارے کہ حکومت پاکستان نا کنڈآن است جم سیکورٹی فراوان کننگانے۔ اوپارے کہ نن گچین کرکٹ اس کننگ کن پراومیت اُن۔ پاکستان کرکٹ ٹیم انا کیپٹن بابراعظم انگلینڈ کرکٹ ٹیم ءِ پاکستان آ بننگ آ بخیر اٹ پارے و گچین ءُ گوازی اس پیش کننگ کن تینا عزم انا درشانی ءِ کرے۔