بنجائی وزیر تخفیف نیزگاری و راجی رکھ شازیہ مری ایس آئی میڈرڈ سپین اٹی اڈ ہلوک 26 می کانگریس اٹی پاکستان نا نمائندگی ءِ کرے

اسلام آباد۔ 28 نومبر (اے پی پی) بنجائی وزیر تخفیف نیزگاری و راجی رکھ و چیئرپرسن بینظیر انکم سپورٹ پروگرام شازیہ مری سوشلسٹ انٹرنیشنل (ایس آئی ) میڈرڈ سپین اٹی اڈ ہلوک 26 می کانگریس اٹی پاکستان نا نمائندگی ءِ کرے۔ داوخت آ شازیہ مری کانگریس نا بشخ ہلوک آتے پاکستان اٹی ساڑی آ پِر و نوکاپ آن مروک آ بھسکاری تیان معلومدار کرے۔ اوکانگرنس نا مندوبین آتے پارے کہ نوکاپ آن پاکستان نا 90 آن زیات ضلع زہمی مسر، صوبہ سندھ و بلوچستان غٹ آن زیات زہمی آ صوبہ غاک ءُ۔ اوسمتی پارے کہ نوکاپ اٹی 33 ملین بندغ زہمی مسر و 1700 بندغ زوال کریر و زرگزران ءِ 40 ارب ڈالر نا نسخان مس۔ بنجائی وزیر شازیہ مری نا حوال ءِ مون آ تخسا سوشلسٹ انٹرنیشنل موسمیاتی بدلی تا نتیجہ ٹی ساڑی آ بھسکار نوکاپ آن زیات زہمی مننگ آ پاکستان نا الس تون یکجہتی نا درشانی ءِ کرے۔ سوشلسٹ انٹرنیشنل نا اعلامیہ ٹی پاننگانے کہ پاکستان نا الس خاص وڑاٹ غٹ آن زیات نیزگار زدہ بندغ آتے موسمیاتی بدلی نا اثرآتا مون تروک ءِ ہراڑکن جہانی برادری ءِ پاکستان نا پبی مخ تفی و کمک ملسا کے۔ اعلامیہ ٹی دا ہیت آ زور شاغنگاکہ جہانی موسمیاتی بدلی نا بابت انصاف آ تالان اسہ ہندن ءُ لائحہ عمل اس طے کے ہرانا رداٹ غٹ اقوام عالم ءِ موسمیاتی بدلی تا اثرآتیان بچفنگ اٹ متناسب کمک فراوان کننگ مرے۔