اسلام آباد۔ 28 نومبر (اے پی پی) بنجائی وزیر قومی جان جوڑی عبدالقادر پٹیل پارینے کہ اینخو سال انا مسٹ میکو ذیلی پولیو تور مہم دوشنبے آن بناکرینے، دا مہم اٹی مچ آ ملک انا 36 ضلع غاتیٹی پنچ سال آن کم وئی نا 13.5 ملین چناتے پولیو تور پڑی کنفنگ نا ہدف ءِ مقرر کننگانے۔ دوشنبےنادے آ وزارت جان جوڑی آن جاری بیان نا رداٹ بنجائی وزیر پارے کہ دوشنبے آن بناکروک آ پولیو تور مہم اٹی پنجاب نا 9 ضلع، سندھ انا 8 ضلع، بلوچستان نا 6 ضلع و اسلام آباد اوار ءُ وخت اس کہ خیبرپختونخوا نا 9 ہائی رسک ضلع غاتیٹی دا مہم 5 دسمبر آ بناکیک۔ مہم اٹی اسہ لکھ آن زیات تربیت یافتہ جان جوڑمحافظ بشخ ہلیرہ، ہرا ہر اُراغا ہنسا پنچ سال آن کم چناتے پولیو آن بچفنگ نا پڑی کنفرہ۔ اوپارے کہ اگہ نن سویلی خیبرپختونخوا آن پولیو دین ءِ چٹفنگ کینہ تو نن پاکستان آن پولیو ءِ پورو وڑاٹ چٹفنگ اٹ سرسہب مرینہ۔ نن اصل اٹ دین نا چٹفنگ آن بھاز خڑک اُن، و نن زوت آن زوت تینا مزل نا خڑک آ سرمننگ کن سنبرینگوک اُن۔ اوپارے کہ پاکستان پولیو نا برخلاف جنگ اٹی بھلو پیش رفت اس کرینے، دین نا تالانی ملک انا اسہ چنکو بشخ اسے ٹی پین رہینگانے۔ اوالس آن خواست کرے کہ پنچ سال آن کم وئی نا چناتے پولیو تور ویکسین نا پڑی ضرور کنفر تانکہ اوفتے جونی معذوری آن بچفنگ مرے۔
