اسلام آباد۔ 28 نومبر (اے پی پی) سی پیک نا ارٹ میکو ریسہ پاکستان اٹی روزگار اٹی ودکی و جی ڈی پی نا نمو اٹی اہم ءُ کڑد اس ادا کننگ ءِ، پاک، چین صنعتی کمکاری پاکستان ءِ ڈیہہ ٹی پیدواری ہند اس جوڑ کیک۔ صنعتی زون تا جوڑ مننگ آن ہندی صنعت کار آتیکن زرکاری نا بے شمار وارخواہی ودی مریک۔ پلاننگ کمیشن کمامدارآتا رداٹ چینی صنعت آتا پاکستان اٹی گدریفنگ آن بے روزگاری نا چٹفنگ ، چندی بشخ آتیٹی معلومداری تا ہل و تس و چاہنداری ٹی ودکی مسنے۔ سی پیک نا داسہ ارٹ میکو ریسہ بناکرینے دا ریسہ ٹی صنعتی کمکاری آن و کشت وکشار نا مون آ دننگ نا ڈٹ آتا سوب آن اولیکو ریسہ غان ہم زیات گیشتر و نمان اثر مرتب مننگ ءِ۔ زند انا ہر بشخ وڑانا وڑ اسے ٹی سی پیک تون گنڈوک ءِ ۔ ہنداخاطران اگہ پاننگے کہ’’سی پیک غٹ اکن ‘‘ تو دا ڈٹ انا وژن نا گچین عکاسی مننگ کیک۔ دااسہ خالص شونداری ڈٹ اسے ہرا نئے بیرہ چین و پاکستان اسکان محدود ءِ بلکن مچ آ ڈیہہ کن شونداری و شونہالی نا ضامن ءِ۔ ہنداخاطران پاکستان و چین ہڑتوم آک ہی سی پیک نا غٹ ڈٹ آتے وخت آ پورو کننگ نا عزم تخرہ۔ سی پیک نا رداٹ درملکی زرکارآتے زیات آن زیات آسراتی تننگ انگ ءِ، فیصل آباد اٹی علامہ اقبال خصوصی اقتصادی زون و رشکئی خصوصی اقتصادی زون آ کاریم جوانی اٹ برجاءِ و بھلو کچ اسے ٹی زرکارآک دا اقتصادی زون تیٹی سرمایہ خلنگ اٹ است خواہی ظاہر کرینو۔ پاکستان چین پاکستان اقتصادی راہداری نا ارٹ میکو ریسہ ٹی صنعتی و کشاری شونداری و گچین سڑک رابطہ غاتا سوب آن فائدہ ہرفنگ انگ ءِ۔ حکومتی سازگار پالیسی تا کمک اٹ زرکارآتے غٹ ممکنہ آسراتی فراوان مننگ ءِ ، اسہ ڈیہہ اسہ شاہراہ ڈٹ ساڑی آ صدی نا تقدیر ءِ بدل کیک ہراٹی چین پاکستان اقتصادی راہداری اسہ اہم ءُ ڈٹ اسے۔ سی پیک نا ارٹ میکو ریسہ ٹی ہڑتوم آ ملک آک گوادر پورٹ ءِ شون تننگ، انڈسٹریل پارکس، کشت وکشار، سائنس و ٹیکنالوجی پین پین اکن گام گیج آتیا چکار تخک۔ چین پاکستان ءِ انڈسٹریلائزیشن ، اربنائزیشن ، ڈیجیٹائزیشن و کشت وکشار نا ماڈرنائزیشن اٹ کمک کننگ ءِ۔ چین پاکستان نا ٹیکسٹائل نا صنعت نا شونداری کن پاکستان نا زیات تر منڈی تسکان اڑزان خام مال سرکننگ کیک ہراکہ کاشغر اٹی ودکی افرادی قوت ءِ کاریم اٹ اتنگ اٹ ہم کمکار ءِ۔ پوسکن آ انڈسٹریل پارک آتیٹی زرکاری کن کمپنی تے متوجہ کننگ کن اولیتی پالیسی تا گرج ءِ ہرا بشخ آتیٹی دا اولیتی پالیسی تا گرج مریک اوفتے ٹی ڈغار، خراج، لاجسٹکس اینڈ سروسز داکان بیدس انٹرپرائز انکم ٹیکس، ٹیرف اٹی کمتی و استثنیٰ و سیلز خراج نا کچ اوار ءِ۔ چین نا زرکار اسٹیل مل، سرمٹ، توانائی، ٹیکسٹائل و آٹو سیکٹر نا بشخ اٹی است خواہی ہلنگ ءُ۔ شونداری کاریم تا سوب آن روزگار اٹی ودکی مریک و لکھ آ پوسکن ءُ وارخواہی ودی مریک ہراڑان ملک اٹی شونہالی بننگ ءِ۔
