استنبول۔25نومبر (اے پی پی): مزن وزیر محمد شہباز شریف ءَ ترکیہ ءِ سرمایہ کار آناں پاکستان ءَ سرمایہ کاری ءِ دعوت دیان ءَ گوشتگ کہ ترکیہ ءِ گوما دو نیمگی تجارت ءَ ھوار توامیں شوبگ آنی تہ ءَ کمک آنی دیمروئی ءِ واستہ جزمیگ آں۔ ناشرکاری ءِ ھلاپ ءَ پاکستان ءُ ترکیہ یک مشت آں، میاں اوستمانی تک ءَ قیمت آنی تہ ءَ بے کساس گیش ءَ چہ نوک دیمروئی کنوکیں ملک گیش آماچ بوھگ ءَ انت۔ اے ھیالانی درشانی آئی ءَ آدینگ ءِ روچ ءَ ترکیہ ءِ صدر رجب طیب اردون ءِ ھمبراھی ءَ یکجائی پریس کانفرنس ءَگوں گشتانک دیان ءَ کت۔ مزن وزیر ءَ گوشت کہ آ ترکیہ ءَ را وتی دومی گس پھم ائیت۔ صدر رجب طیب اردوان ءِ جوانیں میزبانی ءِ پد ءَ شگر ءُمنت و ار آں۔ آئی ءَ گوشت کہ پاکستان ءُ ترکیہ ءَ مدام ھمک سکیں ساھت ءَ یک ءِ دومیگ ءِ کمک کتگ، ناشرکاری ءِ ھلاپ ءَ جنگ ءَ پاکستان ءَ را جانی ءُ مالی تاوان رستگ، ناشرکاری ءِ ھلاپ ءَ پاکستان ءُ ترکیہ یک مشت آں۔ آئی ءَ گوشت کہ ترکیہ ءِ گوما دو نیمگی تجارت آں ھوار جتاجتائیں شوبگ آنی تہ ءَ گیش دیمروئی ءِ واستہ جزمینگ انت۔ آئی ءَ گوشت کہ میاں اوستمانی تک ءَ سامان آنی قیمت آنی تہءَ بے کساس گیشی بوتگ۔ قیمت آنی تہ ءَ گیشی ءَ چہ نوک دیمروئی کنوکیں ملک گیش آماچ بوھگ ءَ انت۔ مزن وزیر ءَ گوشت کہ پاکستان چین ءِ گوما یکجائی ءَ سی پیک منصوبگ دیم ءَ جنزگ ءَ اِنت۔ سی پیک ءِ سرجمی ءَ چہ پڑ ے دیمروئی ءُ وشھالی ءِ نوکیں دور ءُ باریگ ءِ بندات بوتگ۔ آءی ءَ گوشت کہ ترک سرمایہ کار آناں پاکستان ءَ سرمایہ کاری ءِ دعوت دیاں۔ پاکستان ءَ سرمایہ کاری ءِ پراھ ءُ شاھیگانیں موہ است انت۔ آءی ءَ گوشت کہ پاکستان ترکیہ یک جان ءُ دو کالب انت ءُ بے دروریں براتیں ملک انت۔ ترکیہ ءِ صدر رجب طیب اردوان ءَ پریس کانفرنس ءَ گوں گشتانک دیان ءَ گوشت کہ مرچی ما یکجائی ءَ پی این ایس خیبر ءِ لانچنگ کتگ۔ ما پاکستان ءِ گوما یکجائی ءَ بازیں منصوبگ سرجم کتگ۔ آئی ءَ گوشت کہ دوئیں ملک کوھنیں برات ءُ دوست انت۔ ناشرکاری ءِ ھلاپ ءَ پاکستان ءِ ھمک رنگیں کمک کناں، پاکستان ءَ ناشرکاری ءِ ھلاپ ءَ جوانٰں گامگیج کتگ۔ آئی ءَ گوشت کہ ما پاکستانی سیلاپ ءِ آماچیں برات ءُ گہار آنی ھمک رنگیں کمک کتگ۔ آئی ءَ گوشت کہ دو نیمگی تجارت آنی تہ ءَ گیشی مئے ترجی داتگیں کار آنی تہءَ ھوار انت، پاکستان ترکیہ ءَ ھمک سکیں ساھت ءَ یک ءِ دومیگ ءِ گوما ھمبراہ داری کتگ، دوئیں ملک آنی میاں اوستمانی فورمز آنی تہ ءَ ھمگونگیں بن گپ اَنت۔
