اسلام آباد۔24نومبر (اے پی پی): مزن وزیر محمد شہباز شریف ءِ سروکی ءَ بنجاہی کابینہ ءِ دیوان بوتگ۔ پنچ شمبےء ِ روچءَ مزن وزیر کارگس ءِ میڈیا ونگ ءَچہ شنگ بوتگیں بیان ءِردءَ کابینہ ءِ دیوان ءِ بنداتءَ مزن وزیر محمد شہباز شریف ءَ درائیں بنجاہی وزیر آناں وتی نادراہی ءِ وہدءَ حال پُرسی، نیکیں واہگ ءُ جانء ُ سلامتی ءِ ھاترءَ دعا کنگءَ شکرء ُمنت گپتگ۔ مزن وزیرءَ حزانگءِ بنجاہی وزیر ، بینظرانکم سپورٹ پروگرام ءِ چیئرپرسن، موسمی مٹء ُ بدلی ءِ وزیر، توانائی ءِ وزیر، این ڈی ایم اے ء ُدرائیں ہمگرنچیں ادارگاناں ہارءِ آماچیں دمگاں ہارءِ آماچیں مردمانی ریلیف ء ُ بحالی ءِ ھاترءَ گامگیج کنگءَ دادءُ سلام پیش کتگ۔ مزن وزیر ءَ مصر ءِ شہر شرم الشیخ ءَ پاکستان ءَ موسمیاتی مٹ ء ُبدلی ءِ نتیجگءَ انوگیں ہارءَ نقصاناں میاں اوستمانی فورم COP-27 ءِ تہا سوبمندی ءَچہ پدر کنگءَ دری کارانی وزیر بلاول بھٹو زرداری، حال ءُ اھیوال کاری ءِ بنجاہی وزیر ء ُ موسمیاتی مٹء ُ بدلی ءِ وزیرءِ شیری رحمٰن ءِ کوشستاناں ساڑاتگ۔ ایشی ءَ ابید مزن وزیرءِ سیکرٹری سید توقیر شاہءِ ماتءِ اروا ح ءَرا ثواب بکشاہگءِ ھاترءَ دعا کنگ بوتگ۔ ایشی ءَ ابید کابینہ ءَ کانود نافذ کنوکیں ادارگانی انوگیں وئیلاں شہید بوتگیں اہلکارانی مغفرت ءِ ھاترءَ دعا کتگ۔
