کوپ۔27اٹی جہانی فنڈ انا ٹہیفنگ کرہ ارض ءِ موسمیاتی بدلی تا بھسکاری تیان بچفنگ اٹ تاریخی ءُ مزل نا نشان اسے ، بنجائی وزیر حوالکاری و شینکاری مریم اورنگزیب

اسلام آباد۔ 22 نومبر (اے پی پی) بنجائی وزیر حوالکاری و شینکاری مریم اورنگزیب پارینے کہ کوپ۔27 اٹی جہانی فنڈ انا ٹہیفنگ کرہ ارض ءِ موسمیاتی بدلی تا بھسکاری تیان بچفنگ اٹ تاریخی ءُ مزل نا نشان اسے، چاگڑدی انصاف نا خواست انا جہانی کہول آ منظور مننگ پاکستان نا بھلو سفارتی سرسہبی اسے، موسمیاتی بدلی تیان زہمی ملک آتا نسخان تا پوروی کن جہانی فنڈ انا ٹہیفنگ پاکستان نا موقف نا سرسہبی ءِ۔ سے شنبےنادے آ تینا بیان اٹی بنجائی وزیر مریم اورنگزیب پارے کہ پاکستان نا موقف ءِ دنیا امنا کرے۔ وزیراعظم شہباز شریف پدتموک ملک آتیا موسمیاتی بدلی تا اثر و پاکستان اٹ نوکاپ نا بھسکاری تے جہانی ایجنڈاٹی بدل کرے ۔ اوپارے کہ وزیراعظم شہباز شریف نا کماشی ٹی پاکستان نا موقف جہانی امنائی سلاہ ودی کننگ اٹ فیصلہ کن کڑد ادا کرے۔ "ڈیمیج  اینڈ لاس فنڈ” انا ٹہیفنگ آن پاکستان اٹ نوکاپ زہمی تا بحالی ٹی کمک رسینگک۔ اوپارے کہ سیکرٹری جنرل اقوام متحدہ انتونیوگوتریس پدتموک ملک آتا محسن جوڑ مس۔ اوپارے کہ وزیرخارجہ بلاول بھٹو زرداری و وزیر موسمیاتی بدلی شیری رحمان نا کوشست آک جہانی کہول آ پاکستان نا موقف ءِ منفنگ اٹ اہم ءُ کڑد اس ادا کریر۔ غٹ جہانی سرکڑدہ غاک مبارک و خراج تحسین نا حقدار ءُ ہرافک کرہ ارض ءِ بچفنگ کن فیصلہ کن و عملی گام اس ہرفیر۔ دا جہانی سیوت موسمیاتی بدلی تا اثرآتا مقابلہ ٹی اہم ءُ کڑد اس ادا کیک۔