بنجائی حکومت مچ آ ملک انا 20 نیزگار آ ضلع غاتیکن خصوصی شونداری گام گیج آتیا تالان 5 سال انا ڈٹ انا بناءِ کرینے، پلاننگ کمیشن

اسلام آباد۔ 22 نومبر (اے پی پی) بنجائی حکومت مچ آ ملک انا 20 نیزگار آ ضلع غاتیکن خصوصی شونداری گام گیج آتیا تالان 5 سال انا (2022-27)ڈٹ انا بناءِ کرینے ہرادے سینٹرل ڈویلپمنٹ ورکنگ پارٹی منظوری کن ایکنک آ گدریفینے  دا ڈٹ انا اولیکو فیز انا کساس خڑچ 40 ارب روپئی ءِ ہرا بنجائی و صوبائی حکومت آتا نیام اٹ 50 درسد خڑچ انا شریداری نا بنداو آ پورو کننگک۔ پلاننگ کمیشن کمامدارآتا رداٹ پاکستان نا اقتصادی تاریخ اٹی تینا وڑنا اولیکو ڈٹ ءِ ہراڑے بنجائی حکومت نیزگار آ ضلع غاتا شونداری کن پبی گام گیج کننگ ءِ۔ تدوک آ دور حکومت اٹی ،مسلم لیگ ن اقوام متحدہ نا شونداری پروگرام نا کمک اٹ کثیر جہتی نیزگاری انڈیکس سروے ءِ پورو کرے، ہرا اولیکو وار مچ آ ملک اٹی ضلعی کہول آ نیزگاری نا نقشہ ءِ جوڑ کرے ہرا ملٹی پارٹی انڈیکس اسکور نا بنداو آ شناخت کننگا، گچین 20 ضلع غاتیٹی بلوچستان نا 11، سندھ انا 5، خیبرپختونخواآن 3 و پنجاب آن اسہ ضلع اس اوار ءِ۔ دافتیان بھاز انگا ضلع غاک ساڑی آ نوکاپ نا بھسکاری تیان بھاز بے وڑ زہمی مسنو، خاص وڑاٹ بلوچستان و سندھ اٹی ءُ۔ دا ڈٹ انا بنداوی مسخت ملک انا نیزگار آ ضلع غاتیٹی بنداوی پنجر و انسانی سرمایہ نا شونداری ٹی ہدفی زرکاری نا کمک اٹ جوان شونداری و بریبر شونداری ءِ مون آ دننگ ءِ۔ انسانی سرمایہ نا شونداری ٹی زرکاری، خاص وڑاٹ ورنا و زالبول، دا ڈٹ انا بنداوی تمبہ غاتیٹی اوار ءُ۔ پاکستان وژن 2025 و پائیدار شونداری نا جہانی ایجنڈا 2030اتون ہم گرنچ، دا ڈٹ انا مسخت علاقائی بے بریبری ءِ کم کننگ و ملک اٹی قومی یکجہتی و ہم گرنچی ءِ سوگو کننگ اٹ اہم ءُ کڑد اس ادا کننگ ءِ۔ دا ڈٹ یوتھ ڈیویلپمنٹ پروگرام نا بشخ اسے ہرا نا وزیراعظم شہباز شریف تدوک آ تُو بناءِ کریسس۔ داپروگرام نا رداٹ ایلو گام گیج آتیٹی ینگ انجینئرآتے کن 2,000انٹرن شپ، 250منی اسپورٹس کمپلیکس انیشیٹو ، پاکستان انوویشن فنڈ و 75 نیشنل ٹاپ ٹیلنٹ اسکالر شپ آک اوار ءُ۔