وزیراعظم نا سلاہکار قومی میرات و دودوربیدگ ، سیاسی و السی امور انجینئر امیر مقام نا کماشی ٹی دیوان

اسلام آباد۔ 21 نومبر (اے پی پی) وزیراعظم نا سلاہکار قومی میرات و دودوربیدگ ، سیاسی و السی امور انجینئر امیر مقام قومی میرات و دودوربیدگ ڈویژن و اوڑتون گنڈوک محکمہ غاتا چندی ڈٹ آتیا پیش رفت نا جاچ ءِ ہلنگ کن دیوان نا کماشی ءِ کرے۔ دیوان داڑے وزیراعظم آفس اٹی اڈ ہلک ہراٹی سیکرٹری قومی میرات و دودوربیدگ ڈویژن فارینہ مظہر، سینئر جوائنٹ سیکرٹری عبدالستار کھوکھر، جوائنٹ سیکرٹری شہزاددرانی، پاکستان نیشنل کونسل آف آرٹس، لوک میرات تون اوار غٹ تعلقدار محکمہ غاتا سروک آک بشخ ہلکر۔ محکمہ آثار قدیمہ و عجائب گھر (ڈی او اے ایم ) ، پاکستان اکیڈمی آف لیٹرز (پی اے ایل)، ایوان اقبال کمپلیکس ، اقبال اکیڈمی لاہور، قائد اعظم مینجمنٹ بورڈ، قومی زبان نا مون آ دننگ نا بشخ، نیشنل لائبریری آف پاکستان، قائد اعظم مزار مینجمنٹ بورڈ و قائد اعظم اکیڈمی و ایلو محکمہ غاتا سروک آک سلاہکار وزیراعظم ءِ شونداری، پالیسی فیصلہ، آسامی، پوسکن آ گام گیج و ایلو امور تا بابت حوال تسر۔ دیوان اٹی قومی میرات و دودوربیدگ ڈویژن نا چندی محکمہ غاتا چندی دورہ غاتیٹی وزیراعظم نا سلاہکار نا پارت آتیا پیش رفت نا جاچ ءِ ہلنگا۔ دیوان ءِ پاننگاکہ سائنس بورڈ انا ماڑی نا زیب و زینت نا کاریم پورو و بناکن تیار ءِ۔ وزیراعظم نا سلاہکار انجینئر امیر مقام قائد اعظم مزار مینجمنٹ بورڈ انا عہدیدار آتے یوم قائد اعظم آ خصوصی پروگرام اس ترتیب تننگ نا پارت کرے۔ وزیراعظم نا سلاہکار داہیت آ زور شاغا کہ تاریخ پاہک کہ سرسہب قومک ہمومریرہ ہرا تینا دودوربیدگی میرات آتون گنڈوک مریر و اوفتے مون آ دننگ نا کوشست ہم کریر۔ انجینئر امیر مقام فنون لطیفہ نا پوسکنی و ورناتا بشخ ہلنگ آ زور شاغا انتئے کہ دا نئے بیرہ پوسکن آ چین انا کنڈآن تینا دودوربیدگی میرات اٹی است خواہی نا درشانی ءِ کیک بلکن داہیت انا ہم ڈیک ءِ ایتک کہ دا دودوربیدگ و قومی شونداری نا احیاء و سوگوی نا ذریعہ ہم جوڑ مریک۔ اوپارے کہ الس اٹی قومی میرات و دودوربیدگ نا مون آ دننگ ہی راج  ءِ راجی گندہ ئی تیان خار، بے سگی آن بچفنگ کیک و امن و سوگوی اتنگ کیک۔ دیوان ءِ پاننگاکہ لوک میرات تینا سالانہ میگا کلچرل ایونٹ’’لوک میلہ‘‘ 25 نومبر آ داڑے لوک ورثہ کمپلیکس اٹی اڈ ہلیک۔ وزیراعظم نا سلاہکار پارے کہ لوک ورثہ کن دا شرفمندی نا ہیت اسے کہ او ہرسال داوڑنا تہوار اڈ ایتک ہراڑان مچ آ ملک اٹی رہینگوک آ غٹ چین تا دودوربیدگ و روایت آتے پاش کننگ نا موقع ملک ۔ ای ڈی لوک ورثہ پارینے کہ دا لوک ورثہ نا باقاعدہ خصوصیت ءِ، ولے دا سال دا میگا ایونٹ نوکاپ زہمی تیکن وقف کننگانے۔ ریذیڈنٹ انجینئر قائد اعظم مینجمنٹ بورڈ عبدالعلیم دیوان ءِ محکمہ نا جم کارکڑد نا بابت حوال تس۔ ڈائریکٹر جنرل محکمہ آثار قدیمہ و میوزیم دیوان ءِ محکمہ نا برجا ڈٹ آتا بارواٹی حوال تس۔