سٹل آرٹ اتون اوار اوار اسلامک و پاکستانی آرٹ ءِ قومی و جہانی کہول آ مون آ دننگ نا گرج ءِ، بیگم ثمینہ عارف علوی نا عکسی نمائش نا بنائی دود آن تران

اسلام آباد۔ 21 نومبر (اے پی پی) صدر مملکت ڈاکٹر عارف علوی نا اُرائی ثمینہ عارف علوی پارینے کہ سٹل آرٹ اتون اوار اوار اسلامک و پاکستانی آرٹ ءِ قومی و جہانی کہول آ مون آ دننگ نا گرج ءِ، اومیت ءِ کہ ورناک و مون آ بروک آ مصورآک دا نمائش آن فائدہ ہرفرہ و تینا لائخی تے مون آ اتیرہ ۔ داخیال آتا درشانی ءِ او دوشنبے نادے آ عکسی نمائش نا بنائی دود آن تران کرسا کرے۔ اوپارے کہ اللہ تعالیٰ انسان ءِ بھاز انگا لائخی تے تسنے و اواوفتا درشانی ءِ چندی وڑتے اٹ کیک، تینا جوزہ غاتے ایلوفتسکان سرکننگ کن او مصوری، خطاطی، مجسمہ جوڑ کننگ ، ڈرائینگ ، رقص و سازوزیمل ، ادب و ایلو بے شمار ذریعہ غاتے کاریم اٹ اتیک۔ اوپارے کہ فائن آرٹس انا کمک اٹ انسان تینا زیبا انگا جوزہ غاتا درشانی ءِ گچین وڑاٹ کننگ کیک۔ داتخلیقی جوزہ غاتا ہندن ءُ ذریعہ اسے ہرا ننا زند ءِ زیبائی و خوشی اتون درستی راستی کرفک۔ اوپارے کہ فائن آرٹ انا اہمیت ہموخس ءِ اخس کہ تینٹ زند اہم ءِ، دا آرٹس انسان نا ارتقاء و تاریخ ءِ گنڈنگ اٹ کمکار مریک، آرٹ تینا چندی دروشم تیٹی قوم انا کلچر، دودوربیدگ ، راجی قدر و تہذیبءِ تالان کننگ نا اہم ءُ ذریعہ اس ہم ارے، ننا اسلامی کلچر، دودوربیدگ و آرٹ شاندار روایت آتاحاملءِ، اسلامی فن تعمیرات و خطاطی نا وڑک مچ آ دنیا ٹی تینا یکتاءُ شناخت اس تخرہ۔