پاکستان’’نو منی فار ٹیرر‘‘ وزارتی دیوان اٹی بھارتی سرکڑدہ نا بے بنداو پروپیگنڈا و غیرزموارانہ بیان ءِ مسترد کرے

اسلام آباد۔ 21 نومبر (اے پی پی) پاکستان ’’نومنی فارٹیرر‘‘ وزارتی دیوان اٹی بھارتی سرکڑدہ نا بے بنداو پروپیگنڈا و غیرزموارانہ بیان ءِ مسترد کرینے۔ دوشنبےنادے آ دفترخارجہ نا کنڈآن جاری بیان نارداٹ ترجمان دفترخارجہ ممتاز زہرہ بلوچ پارینے کہ پاکستان نئی دہلی ٹی اڈ ہلوک پن انا ’’نومنی فار ٹیرر‘‘ وزارتی دیوان اٹی بھارتی سرکڑدہ نا کنڈآن اونا برخلاف غٹ حوالہ و دوبہ غاتے سختی اٹ مسترد کیک۔ بھارت ہر دوئی فورم آ پاکستان ءِ بدنام کننگ نا تینا قابل قبول و لاعلاج خواہش نارداٹ کالعدم دہشت گرد تنظیم تا مالی کمکاری ٹی پاکستان آ مبینہ وڑاٹ اوار مننگ نا وار وار آ دروغ انا دوبہ خلسا دنیا  ءِ دہشت گردی نا انسداد اٹی پاکستان نا سرسہبی تا بارواٹی گمراہ کرسا کیک۔ اوپارے کہ بھارت نا خورک بیان بیازی پاکستان نا سرسہب انسداد دہشت گردی نا گام گیج آتا مون آ بے سہب مسنے، ہرافتا انسداد دہشت گردی، انسداد منی لانڈرنگ و دہشت گردی نا مالی کمکاری نا توننگ نا بڑزکو جہانی ادارہ فنانشل ایکشن ٹاسک فورس (فٹیف) نا کنڈآن امنا و اعتراف ءِ کننگانے۔ ننا سوگو و پت انا قابل ایم ایل/سی ایف ٹی گام گیج، و فٹیف ایکشن پلان تیا است جم عملدرآمد آن دااکتوبر اٹی پاکستان ءِ گرے لسٹ آن کشنگ اٹ سرسہبی دوئی کرے۔ اواست ہسونی ظاہر کرے کہ بھارت غیرکانودی وڑاٹ تینا کوزہ گیری ٹی جموں وکشمیر اٹی تینا دہشت گردی نا مہم ءِ پدریسہ برجاتخانے۔ جموںو کشمیر اٹی بھارت نا ریاستی سرپرستی ٹی مروک آ دہشت گردی نا ہچ ءُ جواز اس اف ہراڑے اونا سیکورٹی فورس آک ہڑدے بے گناہ کشمیری تے دہشت، اذیت و تشدد نا شست کیرہ۔ اوپارے کہ است ہسونی نا ہیت دادے کہ بھارت کیہی دہائی آن دہشت گرد آتے پناہ و رکھ فراوان کننگ ءِ۔ 2019اٹی، او سوامی اسیمانند ءِ بری کرے ہرا 2007 نا سمجھوتہ ایکسپریس دھماکہ نا مرکزی کڑد ئسک ہراٹی بھارتی گل زمین آ 43 پاکستانی شاری قتل مسوسر۔ اینخو سال انا بناٹی ، بھارتی عدالت آک گجرات اٹی 2002 نا گودھر افسادات اٹی بلقیس بانو نا اجتماعی عصمت دری کیس انا 11 ڈوہدار تے رہاکریر۔ ہنداوڑ، 26 نومبر نا ممبئی جلہو آتا مقدمہ نا سماعت اٹی بھارت رزاک اٹ پاکستانی عدالت آتیان گواہ و متبر شاہدی تے تورے، تدوک آ 14 سال اٹی وار وار آ درخواست آتیان پد ہم ، بیرہ تینا ناپاک سیاسی ایجنڈا ءِ پورو کننگ کن کیس ءِ طوالت تننگا۔ اوپارے کہ پاکستان نا تہہ ٹی دہشت گردی ءِ ہشکا تننگ اٹ ہندوستان نا اوار مننگ بھلو کچ اسے آ پک و دستاویزی ءِ۔ نومبر 2020ٹی، پاکستان اسہ جامع ڈوزیئر اس جاری کریسس ہراٹی پاکستان اٹی تخریبی سرجز آتیٹی بھارت نا اوار مننگ نا شاہدی فراوان کننگاسس۔ سزایافتہ، حاضرسروس، بھارتی نیول کمانڈر کلبھوشن یادیو تخریب کاری ودہشت گردی ٹی بھارت نا براہ راست اوار مننگ نا ناقابل تردید شاہدی ءِ۔ ٹی ٹی پی و اوغانستان نا تہہ ٹی پاکستان تون دشمنی تخوک آ ایلو زموار آتون ہندوستانی رابطہ غاتا بارواٹی غٹ واقف ءُ۔ اوپارے کہ پاکستان جہانی برادری آ زور شاغک کہ او بھارت نا غیرکانودی کوزہ گیری ٹی جموں و کشمیر اٹی اونا گام گیج، دہشت گرد ادارہ غاتا سرپرستی و ہمسایہ ملک آتیٹی دہشت گردی ءِ تہوتننگ کن ہندوستا ن ءِ جوابدہ گوندے۔ ہندوستان ءِ مرے کہ او دہشت گردی نا بارواٹی تینا تشخص ءِ دمدستی وڑاٹ سہی کے و خودغرضانہ سیاسی فائدہ غاتا دوئی کننگ کن بے شرمی اٹ دُوارہ دروغ انا دوبہ خلنگ آن پاناد کے۔