اسلام آباد۔ 18 نومبر (اے پی پی) بنجائی وزیر ساجد حسین طوری پرتگال نا وزیر خارجہ خواری میگوئل فونٹیس و پبلک ورکس ڈیپارٹمنٹ نا صدر ڈومنگولوپس تون اوڑدہی کرینے۔ ساجد حسین طوری ہرا کہ دادے تیٹی پرتگال نا سرکاری دورہ غاٹی ءِ، دا پرتگالی راہشون تتون اوڑدہی ٹی ہڑتوم آ کنڈآتا تعلقداری، امیگریشن نا عمل ءِآسان جوڑ کننگ و تین پہ تینی است خواہی نا امور آ گپ وتران کرے وخت اس کہ اوڑدہی ٹی پرتگال و پاکستان نا نیام اٹ انسانی وسیلہ و مزور آتا ہن و برنا پروگرام تیٹی کمکاری ءِ پین ودفنگ نا عمل آ سرجمی اٹ گپ وتران ہم کننگا۔ ساجد حسین طوری انسانی وسیلہ غاتا بشخ اٹی ہڑتوم آ ملک آتا نیام اٹ کمکاری ءِ ودفنگ آ زور شاغا انتئے کہ داڑان ہڑتوم آ فریق آتے فائدہ ملنگ کیک۔ بنجائی وزیر مستی پارے کہ پاکستان ءِ پرتگال تون تینا خوشگوار و دوستانہ تعلقداری تیا گمر ءِ۔ پاکستان و پرتگال مدام اسہ ایلو تون کمکاری و تعلقداری تے سوگو کننگ کن اواری اٹ کاریم کرینو۔ اوپارے کہ پاکستان اقتصادی بشخ اٹی تعلقداری تے ودفنگ اٹ است خواہی تخک، پرتگال اٹی اونا ساڑی گری نا اسٹ انگا سوب کسبکار و خواری کش پاکستانی تیکن پرتگال اٹی کاریم کننگ نا وارخواہی ودی کننگ ءِ۔ اوپیدوار کرے کہ پرتگالی کمپنیک پاکستانی آئی ٹی چاہندار و کسبکار کارندہ غاتا خذمت آتے دوئی کننگ کیرہ۔ پاکستان چندی بشخ آتیٹی افرادی قوت پک کرسا پرتگال نا کمک ءِ کننگ کن تیار ءِ۔ بنجائی وزیر پارے کہ لیبر موبلٹی پارٹنر شپ انا سلاہ ئی مسودہ غا زوت دستخط کننگے۔ لیبر موبلٹی پارٹنر شپ اآ معاہدہ ہڑتوم آ ملک آتا نیام اٹ کمکاری ءِ ودفنگ کن کانودی فریم ورک اس فراوان کیک، ہڑتوم آ ملک آتا طالب علم آتا ہن و برنا پروگرام آ کاریم کننگ ءِ۔ اوپارے کہ او خوش ءِ کہ پاکستانی طالب علم آتے پرتگال اٹی تعلیم دوئی کننگ نا وارخواہی ملنگ کیک، پاکستان وپرتگالی تے امیگریشن و ویز انا دوئی کننگ نا عمل ءِ ترند کننگ کن کاریم کننگے۔ وزیر جم و جوش اٹ بخیر آ اوفتا منت واری ءِ ہرفے۔ اوپاکستان نا حکومت و الس نا کنڈآن پرتگال نا حکومت و الس کن نیک است خواہی نا درشانی ءِ کرے۔
