اسلام آباد۔ 18 نومبر (اے پی پی) قومی اسمبلی چناتا جہانی دےا نا وخت آ امنائی وڑاٹ اسہ قرارداد اسے نا منظوری ءِ تسنے ہراٹی خواست کننگانے کہ ملک اٹی غٹ چناتا اسہ وڑ نشوونما، جمہوری عمل اٹ اوفتا بشخ ہلنگ و اوفتا ہروڑاٹ خیال داری ءِ پک کننگے و چناتتون تعلقدار ہروڑنا ڈوہ تیکن کانود سازی کننگے و داچرجوئی ٹی جوڑ پارلیمانی کاکس ءِ فعال کننگ کن ہرکہول آ کمکاری ءِ پک کننگے۔ جمعہ نادے آ قومی اسمبلی ٹی پارلیمانی کاکس چائلڈ رائٹس نا کنوینر مہناز اکبر عزیز ایوان آن قاعدہ معطلی نا تحریک نا منظوری آن پد قرارداد پیش کرسا پارے کہ دا ایوان موسمیاتی بدلی نا منفی اثرآتا نتیجہ ٹی 16 ملین چناتا مشکل آتے شدت اٹ محسوس کیک، پاکستان اٹ پِر و نوکاپ نا سوب آن کم از کم 34 لکھ مار ومسنک زہمی مسنوو اوفتے دمدستی وڑاٹ طبی امداد نا سخت گرج ئسک۔ اوپارے کہ دا ایوان پاکستان اٹی ودی مروک آ ہرچناڑتون اوار اوار اوفتا لمہ غاتا حق ءِ ہم امنا کیک و غٹ چناتیکن گچین خیالداری و رکھ چاگڑد اسے نا فراوانی نا گرج آ زور شاغک۔ اوپارے کہ داایوان ہر چنانا زند انا اولیکو ہزار دے انا اہمیت ءِ تکک ہرا دماغ نا نشوونما و چناتا گچین جان جوڑی و آخبت نا نشوونما نا بنداو ءِ تخنگ کن وارخواہی تا اسہ یکتا ءُ دور اس مریک۔ داایوان چناتا اسمگلنگ ، چناتتون بدسلوکی و اوفتے تون بے رحمان برتاؤ نا مذمت ءِ کیک و فحش نگاری و جسم فروشی کون آ غیر انسانی و وحشیانہ ڈوہ تے توننگ کن گچین کانود سازی نا سفارش کیک و دابابت ساڑی کانود آتیا عملدرآمد آ زور شاغک۔ قرارداد اٹی پاننگانے کہ دا ایوان 1973 ء نا آئین اٹی درج چناتا حق انا رکھ انا باوری کرفک۔ اقوام متحدہ نا حقوق اطفال کنونشن نا رداٹ دا ایوان راج اٹی امن وہم آہنگی اس جوڑ کننگ، جان جوڑ زند اکن سازگار چاگڑد اس ودی کننگ کن چناتا اہم باندات آتیٹی بشخ ہلنگ ءِ پک کننگ نا قول کیک۔ داایوان آئین نا آرٹیکل 11 نا رداٹ چناتیان جبری مشقت ہلنگ نا سختی اٹ منع کیک۔ دا ایوان آئین نا آرٹیکل 25 اے ٹی درج چناتا آب اٹ تعلیم نا دوئی کننگ کن اسہ وڑ وارخواہی ودی کننگ نا قول کیک۔ و دا ایوان لمہ و چنانا غذائیت اٹی کمتی و پاکستان نا آخبت نا رکھ اکن چناتا زہمی مروک آ نشوونمانا خطرہ غاتون مون تننگ کن کوشست آتا عزم کیک و قول کیک کہ ہرا چناجسمانی ، ذہنی یا پین معذوری تا گواچی ءِ اودے خصوصی درمان، تعلیم و خیالداری نا آسراتی فراوان کننگک۔ قرارداد اٹی پاننگانے کہ دا ایوان چناتا اہم باندات آتیٹی بشخ ہلنگ نا وارخواہی ودی کننگ نا قول کیک انتئے کہ اوفتا اوار مننگ جمہوریت نا آخبت کن اہم ءِ۔ قومی اسمبلی قرارداد ناامنائی سلاہ اٹ منظوری ءِ تس۔
