اسلام آباد۔ 18 نومبر (اے پی پی) قومی اسمبلی ءِ پاننگانے کہ پابندی تا سوب آن ایران تون آجو واپار نا معاہدہ متنے، پابندی تا چٹنگ آن پد ایران تون آجو واپار نا معاہدہ ءِ گڈیکو دروشم اس تننگک۔ جمعہ نادے آ قومی اسمبلی ٹی کمال الدین و ایلو باسک آتا دا بابت سوج آتا ورندی ٹی وزیر واپار سید نوید قمر ایوان ءِ پارے کہ یو اے ای و ایلو ملک آتیان برآمد آتیٹی ودکی مسنے، ہندا وڑ جہانی برادری تون ننا واپاری کچ اٹی ہم ودکی مسنے۔ شیخ فیاض الدین نا سوج آ اوپارے کہ پاکستان ایران تون واپار کننگ ءِ۔ پابندی تا سوب آن ایران تون واپار بینکنگ چینل آ اف بلکن بارڈر آ بست وبند آتا کمک اٹ مننگ ءِ۔ واپار ہموتم آ ودک ہراتم ایران آن پابندی تے ہرفنگک۔ مولانا جمال الدین نا سوج آ وزیر واپار ایوان ءِ پارے کہ ایران تون ایف ٹی اے آ گپ وتران بناکریسس ولے پابندی تا سوب آن اوٹی پیش رفت مننگ کتنے۔ ہراتم پابندی تے ہرفنگک تو آجو واپار نا معاہدہ ءِ گڈیکو دروشم اس تننگک۔ مولانا عبدالاکبر چترالی نا سوج آ پارلیمانی سیکرٹری وزارت اقتصادی امور چوہدری فقیر احمد پارے کہ نوکاپ آن پد جہانی امداد نا غٹ سرجم آتے تننگانے۔ اوپارے کہ وزارت اقتصادی امور نا کاریم بیرہ گپ وتران و بست وبند کننگ ءِ۔ ہراامداد بریک او تعلقدار ادارہ و صوبائی حکومت آتیا کارہ، امداد نا بشخنگ اٹی وزارت نا ہچ ءُ کڑد اس اف۔
