اسلام آباد۔ 18 نومبر (اے پی پی) خاتون اول بیگم ثمینہ عارف علوی ملک اٹی سینہ نا کینسر آن زالبول آتا مرک ءِ کم کننگ کن آگاہی مہم ءِ برجاتخنگ و گچین گام گیج کننگ نا گرج آ زور شاغسا پارینے کہ دا مرض انا وخت آ درمان آن مرک آتا کچ اٹی کمتی اتنگ مریک۔ داخیال آتا درشانی ءِ او جمعہ نادے آ داڑے اسلام آباد چیمبر آف کامرس اینڈ انڈسٹری نا کنڈآن سینہ نا کینسر نا بابت اڈ ہلوک دود آن تران کرسا کرے۔ دود اٹی پوریا گر تنظیم تا عہدیدار، طبی چاہندار و زالبول آتا اسہ بھلو کچ اس ہم ساڑی ئسر۔ اوپارے کہ ایلو ملک آتامقابلہ ٹی پاکستان اٹی سینہ نا کینسر آن مرک آتا کچ زیات ءِ ، ملک اٹی ہر 9 آن اسہ زالبول اسے سینہ نا کینسر مون تروک ءِ، ملک اٹی ہرسال دا مرض آن 50 ہزار نیاڑی زوال کیرہ۔ اوپارے کہ دا مرض انا توننگ کن رکھی گام گیج آتون اوار اوار زوت و وخت آ تشخیص المی ءِ، زالبول تینٹ تشخیص آن تینا زند ءِ بچفنگ کیرہ۔ بیگم ثمینہ عارف علوی پارے کہ میڈیا، تعلیمی ادارہ، ہسپتال و پوریاگر تنظیمک آگاہی مہم اٹی پبی تفنگ اٹی ءُ۔ اوپارے کہ پاکستان اٹی سینہ نا کینسر نا ہرے آن تشخیص نا سوب بھلو کچ اسے آ جان تا زیان مریک ہرا گڑتی نا سوب ءِ۔ زالبول آتے دا مرض آن بچفنگ کن ہر چار آ صوبہ غاتیٹی آگاہی مہم چلیفنگ انگ ءِ ہرانا خاطر خواہ بھرم دوئی مننگ اٹی ءِ، دامرض انا اخس زوت تشخیص مریک ہموخہ زیات جون تے بچفنگ نا گمان ودک۔ اوپارے کہ تدوک آ چار سال آن آگاہی مہم چلیفنگ اُن، میڈیا، سوشل میڈیا و ایلو ذریعہ اٹ آگاہی مہم اس چلیفنگ انگءِ ہرانا مثبت بھرم دوئی مننگ ءِ ، داڑتون اوار اوار یونیورسٹی تیٹی آگاہی سیمینار ہم اڈتننگ برجاءِ۔
