اسلام آباد۔ 17 نومبر (اے پی پی) بنجائی وزیر ڈٹ بندی ، شونداری، اصلاحات و خصوصی گام گیج احسن اقبال پارینے کہ ساڑی حکومت نا اولیت ملک اٹی زرگزرانی بدلی و سوگوی اتنگ و قومی شونداری نا سفر ءِ دُوارہ بناکننگ ءِ، 2017-18ٹی ملک انا 2025 اسکان دنیا نا 25 بھلا زرگزران تیٹی اوار مننگ نا ہدف ءِ دوئی کننگ نا خڑک ئسک، 2018 ٹی عمران حکومت ملکی زرگزران نا بیڑہ ءِ غرق کرے۔ داخیال آتا درشانی ءِ او تینا کماشی ٹی آخبت نا راجی اقتصادی روڈ میپ پاکستان آؤٹ لک 2035 بناکننگ نا بابت بڑزکو کہولی دیوان اٹی کرے۔ اوپارے کہ وزارت پاکستان نا آخبت نا شونداری منظرنامہ نا تعمیر نا بارواٹی زوت اسہ جوان ءُ سٹڈی پاکستان آؤٹ لک 2035 آ کاریم نا بناءِ کیک ہرا ساڑی زرگزرانی تنکی تے مون آ تخسا مریس مدتی چیلنج آتا جاچ ءِ ہلیک و کلیدی وڑاٹ زرگزران نا بشخ آتیٹی ملک انا ترند رفتار راجی اقتصادی شونداری کن پالیسی ساز آتیکن جہانی چیلنج آتا رداٹ گچین کاری نا پیدوار ی ءِ کیک۔ بنجائی وزیر پارے کہ پاکستان نا زرگزران ءِ بنداوی پنجر جاتی بدلی و پوسکن آ برآمد آتا شونداری نا مون آ دننگ نا گرج ءِ۔ ہرا کم ازکم اسہ دہائی اسکان آخبتی پالیسی فریم ورک آ عمل کرسا ہی دوئی کننگ مریک۔ اوپارے کہ 2017-18ٹی ملک انا 2025 اسکان دنیا نا 25 بھلا زرگزران تیٹی اوار مننگ نا ہدف ءِ دوئی کننگ کن تینا کسر آ ئسک دُن کہ مسلم لیگ ن نا حکومت نا رداٹ 2014 ٹی پاکستان نا وژن 2025 اٹی طے کننگاسس ولے 2018 ٹی حکومت نا بدلی اسہ بھلو رخ اسے موڑتس۔ پالیسی تا چرجوئی ءِ چٹفنگا و تدوک آ حکومت تصادم نا کسر ءِ اختیار کرے ہراڑان زرکارآتا پت پنا و شونداری نا تغ بھس مس و کم و ود چار سال پد ساڑی حکومت ءِ زرگزرانی خواتہ پن نا خڑک اسہ ملک اس میرات اٹی ملا ۔ پاکستان آؤٹ لک 2025 نا اہمیت ءِ تالان کرسا احسن اقبال پارے کہ اولیکو دے آن ننا اولیت ملک اٹی زرگزرانی بدلی و سوگوی اتنگ و قومی شونداری نا سفر نا دُوارہ بناءِ کننگ ءِ۔ اگہ نن یک و نیم دہائی آن پد معمول نا رداٹ کاروبار کینہ تو پاکستان آؤٹ لک 2035 ننے دا سرپند مننگ اٹ کمک کیک کہ نن داوخت آ ہراڑے کن اُن و نن ہرانگ ہِننگ اُن وآخبت اٹ ہراڑے سلوئی ءِ آؤٹ لک 2035 نا اہمیتءِ مستی تالان کرسا احسن اقبال پارے کہ وزارت نا کمامدار آتے اسٹیک ہولڈر آتا مصروفیت آتا کمک اٹ مطالعہ ءِ پورو کننگ کن تننگاسس۔ دیوان اٹی بنجائی وزیر دا گام انا چاروکی ءِ کننگ کن اسہ اسٹیئرنگ کمیٹی اس جوڑ کننگ نا پارت کرے ہراٹی ملک انا ماہرین اقتصادیات، نجی بشخ و ملک انا پٹ وپولی ادارہ غاک اوار مریرہ وخت اس کہ چیف اکانومسٹ داکوشست ءِ مربوط کیک۔
